ЖССТ коронавирус Хитойдан ташқари дунёнинг 85 мамлакатида тарқалганини эълон қилди

Хитойдан ташқарида янги турдаги COVID-19 коронавирусини юқтириб олганлар сони 14,7 минг кишидан ошиб кетди. Жаҳон соғлиқни сақлаш ташкилотининг маълумотларига кўра, 5 март куни яна 2098 кишида коронавирус аниқланган.

Таъкидланишича, коронавирус билан касалланиш ҳолати дунёнинг 85 давлатида аниқланган. Ўтган бир сутка давомида Хитойдан ташқарида вирус 53 кишининг умрига зомин бўлган. Коронавирус оқибатида Хитойдан бошқа давлатларда вафот этганларнинг жами сони 267 кишига етган.

ЖССТнинг маълумот қилишича, дунё бўйлаб 95 333 кишида коронавирус аниқланган, шуларнинг 80 565 нафари — Хитойда. Вирус оқибатида Хитойда вафот этганлар сони 3015 кишини ташкил этмоқда.

6 мартдан бошлаб Москвада коронавирус сабаб юқори шайлик режими жорий этилди. Москва мэри Сергей Собянин коронавирус аниқлангандан сўнг, 85 киши карантинга олингани, 24 киши касалхонага ётқизилгани ҳақида хабар берганди. Буюк Британияда коронавирус билан касалланганлар сони 100 нафардан ошиб кетган. Саудия Арабистони подшоҳлиги эса коронавирус тарқалишининг олдини олиш мақсадида мамлакат фуқаролари ва доимий истиқомат қилувчи хорижликларга (резидентларга) ҳам Умра амалини тақиқлаш тўғрисида қарор қабул қилган. Ўзбекистонда коронавирус тарқалганини рад этган ССВ аҳолини касалликдан ҳимояланишга ундовчи SMSлар жўната бошлади.