Москва шаҳрида коронавирус тарқалиши хавфи сабаб юқори шайлик режими жорий этилди. Бу борадаги тегишли қарорни шаҳар мэри Сергей Собянин имзолади.
Қарорда кўрсатилишича, Хитой, Жанубий Корея, Италия, Эрон, Франция, Германия ва Испанияга бориб қайтган фуқаролар 14 кун давомида ўзларини уй шароитида мустақил изоляция қилиши керак — ишга, ўқишга ва жамоат жойларига боришдан тийилишлари лозим.
Коронавирус аниқланган бошқа давлатлардан келган фуқаролар Россияга қайтиб келганликлари ҳақида хабар бериши ва ўзларининг телефон рақамларини қолдиришлари лозим. Касаллик аломатлари аниқланган вақтда улар зудлик билан шифокорга мурожаат қилишлари керак.
Қарорга кўра иш берувчиларга ўз ходимларининг тана ҳароратини иш жойида ўлчаш, кимда юқори ҳарорат аниқланса, ишдан четлатиш чорасини кўриш мажбуриятини юклайди. Шунингдек, зарур ҳолатда иш берувчи ходимларига уй шароитида мустақил изоляция режимини таъминлашга ёрдам кўрсатади.
Сергей Собяниннинг сайтида ёзилишича, Москвада умумий вазият нисбатан тинч.
Аввалроқ Кремлда Россия президенти Владимир Путин атрофида коронавирус тарқалишининг олдини олиш учун барча чора-тадбирлар кўрилаётгани тўғрисида хабар берилганди. Февраль ойи охирида Италиядан қайтган эркакда коронавирус топилганлиги 2 март куни маълум бўлди. У шифокорларга мурожаат қилган, шундан сўнг касалхонага даволаниш учун жойлаштирилган. Москва мэри Сергей Собянин коронавирус аниқлангандан сўнг, 85 киши карантинга олингани, 24 киши касалхонага ётқизилгани ҳақида хабар берган эди.
Изоҳ (0)