«Интер» коронавирус тадқиқотлари учун 100 минг евро ажратди

«Интер» клуби Милан шаҳридаги янги турдаги коронавирусни ўрганиш ишлари олиб бораётган «Луижи Сакко» шифохонасининг биотиббиёт тадқиқотлари ўтказувчи бўлимга 100 минг евро миқдорида хайрия қилди. Бу ҳақда клуб расмий сайти хабар бермоқда.

Маълум бўлишича, мазкур хайрия пуллари Ломбардия вилоятида тарқалган коронавируснинг намуналаридан илк учта тўлиқ геномини аниқлашга муваффақ бўлган бўлимнинг тадқиқот фаолиятини қўллаб-қувватлашга йўналтирилади.

Геномларни таҳлил жараёнлари Италияга кириб келган вирус ва унинг эҳтимолий тарқалиш йўлларини тўғри баҳолашга имкон беради.

«Интер» Милан шаҳри билан чамбарчас боғлиқ ва фавқулодда ҳолат билан курашаётган фидокор Сакко шифохонаси ходимлари билан фахрланади. Коронавирус билан боғлиқ қалтис вазиятнинг энг бошиданоқ биз диққат ва хавотир билан воқеалар ривожини кузатиб боряпмиз. Ҳаммасидан ҳам энг муҳими бу жамиятнинг саломатлиги ва хавфсизлигидир. «Интер» айнан шу сабабдан Сакко шифоханасини қўллаб-қувватлашни ў з бурчи деб ҳисоблайди», — дейди клуб президенти Стивен Чжан.

4 март, чоршанба куни Италия миллий фуқаролик муҳофаазаси хизмати раҳбари Анжело Борелли мамлакатда коронавирус билан зарарланганлар сони 3 минг кишидан ошгани, 107 нафар киши инфекция қурбонига айлангани ҳақида маълум қилди. Бир вақтнинг ўзида вирусдан шифо топганлар сони 116 нафардан 276 кишига етди.

Эслатиб ўтамиз, Хитой ҳукумати 2019 йилнинг 31 декабрь куни Бутунжаҳон соғлиқни сақлаш ташкилотини мамлакатнинг марказий қисмида жойлашган Ухань шаҳрида пайдо бўлган номаълум зотилжам ҳақида хабардор қилган эди.

Мутахассислар юзага келган касалликни янги коронавирус сифатида қайд этди.

Бутунжаҳон соғлиқни сақлаш ташкилоти мазкур вирус тарқалишини халқаро даражадаги фавқулодда ҳолат деб баҳолаб, унга расман COVID-19 деб ном берди.

Сўнгги маълумотларга кўра, Хитой ҳудудида 80 мингдан зиёд киши касалликни юқтириб олган, 3015 киши вирус қурбонига айланган, 52 мингдан зиёд киши соғайишга муваффақ бўлган. Бутунжаҳон соғлиқни сақлаш ташкилотининг сўнгги маълумотига кўра, Хитой ташқарисидаги 78 мамлакатда вирусдан зарарланганлар сони 14,5 мингдан ошиб кетди, 264 нафар киши вафот этган.