УЕФА ташкилоти Revelent Sports компанияси билан ёзги янги мусобақани яратиш устида ишламоқда, дея хабар қилмоқда Daily Mail.
Revelent Sports томонидан уюштириладиган Халқаро Чемпионлар Кубоги ўрнида Чемпионлар Лигасига ўхшаш мусобақа ташкил этиш режа қилинмоқда. Янги мусобақада саралаш, гуруҳ босқичи ва плей-офф ўйинлари бўлади.
Мусобақа 2021 йилдан бошланиши кутилмоқда, шартнома 8 йилга мўлжалланган бўлади. Аввалига беллашувлар АҚШда бўлиб ўтади, кейинчалик мусобақани Осиё мамлакатларида ўтказиш режаси ҳам мавжуд.
Шунингдек, топ-клублар мусобақада асосий таркиби билан иштирок этиши борасида келишувга эришилгани тахмин қилинмоқда. «Манчестер Юнайтед», «Манчестер Сити», «Челси», «Арсенал», «Ливерпуль» ва «Тоттенҳэм» клублари мазкур ғояни қўллаб-қувватлаган.
Эслатиб ўтамиз, УЕФА ташкилоти терма жамоалар ўртоқлик ўйинлари ўрнини босувчи Миллатлар Лигаси мусобақасини ташкил этди. Шунингдек, ташкилот 2021 йилдан бошлаб учинчи Еврокубок мусобақаси — Конференциялар Лигасини жорий этганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)