Россия пойтахти Москва шаҳрига Италиядан қайтиб келганидан кейин коронавирус аниқланган беморнинг ҳолати қониқарли. Бу ҳақда Россия соғлиқни сақлаш вазири Михаил Мурашко маълум қилди, деб хабар беради «РБК».
«Бу бемор ўзини қониқарли ҳис қилмоқда. Вазият жуда яхши», — деб таъкидлаган Михаил Мурашко.
Унинг сўзларига кўра, ҳозирги кунда бемор билан алоқада бўлган шахслар тиббий назоратда турибди ва уларда коронавирус аниқланмаган.
Февраль ойи охирида Италиядан қайтган эркакда коронавирус топилганлиги 2 март куни маълум бўлди. У шифокорларга мурожаат қилган, шундан сўнг у касалхонага даволаниш учун жойлаштирилган. Москва мэри Сергей Собянин коронавирус аниқлангандан сўнг, 85 киши карантинга олингани, 24 киши касалхонага ётқизилгани ҳақида хабар берган эди.
ЖССТ маълумотларига кўра, Италияда коронавирус билан касалланганлар сони 2036 нафарга етди, 50 дан ортиқ одам касалликнинг қурбонига айланди. Эронда коронавирус юқтирганлар сони 2300 кишидан ошди. Россия ТИВ россияликларга Италияга сафарларини вақтинча бекор қилишни тавсия қилди. Кейинчалик «Ростуризм» сайёҳлик агентликларини Италияга турлар сотишини тўхтатишга чақирган.Мавзуга доир: Тармоқларда Москвада 20 минг одам коронавирус билан касаллангани ҳақида фейк хабарлар тарқалди
Сўнгги маълумотларга кўра, Саудия Арабистонида коронавирус билан касалланган илк бемор аниқланди. Украинада биринчи марта коронавирус билан касалланиш ҳолати қайд этилди. Латвия ва Марокашда ҳам коронавирус билан касалланиш ҳолати аниқланди. Озарбайжонда коронавирус сабабли барча ОТМ ва мактаблар вақтинча ёпилди. Тожикистонга 35 та давлат фуқароларининг кириши тақиқланди.
Бутун дунё бўйлаб коронавирусни юқтириб олганлар сони эса 90 370 кишига етган. Касалликка чалинганлар сони бўйича Хитойдан кейинги ўринларда Жанубий Корея (4335) кетмоқда. Жаҳон соғлиқни сақлаш ташкилотининг маълум қилишича, дунёнинг 64 давлатида коронавирус аниқланган.
Изоҳ (0)