Украинада биринчи марта коронавирус билан касалланиш ҳолати аниқланди. «РИА Новости»нинг хабар беришича, касалланган эркак Италиядан Руминия орқали келган бўлиб, ҳозирда Черновци шаҳридаги касалхонага ётқизилган.
Қайд этилишича, эркак ўз рафиқаси билан бирга Румиянинг Сучава шаҳридаги аэропортдан қайтаётганида шифокорлар уларнинг тана ҳароратини текширган. Текширувдан сўнг уларга Украинага кетишга рухсат берилган.
Ватанига қайтгач, улар яна текширувдан ўтказилган ва касаллик аломатлари топилмаган. Шунга қарамай, эр-хотин ўз хоҳиши билан квартирасида карантин сақлашга қарор қилган. Орадан бир неча кун ўтгач эркакда касаллик белгилари пайдо бўлган ва у касалхонага ётқизилган.
Аввалроқ Хитойдан қайтган Украина фуқаролари ўтирган автобус тош бўрон қилингани хабар берилган эди. 20 февраль куни Хитойдан эвакуация қилинган Украина фуқаролари Полтава вилоятининг Новие Санжари қишлоғидаги карантин тиббиёт марказига олиб борилган. Улар кириб келаётган вақтда қишлоқ аҳолиси йўлларни тўсиб, карантин ҳудудига келаётганларни киритмасликка уринган, оқибатда оломон ва ҳуқуқни муҳофаза қилувчи органлар ходимлари ўртасида тўқнашув содир бўлганди.
Зеленский қишлоқ аҳолисининг бу ҳаракатини Европа ўрта асрлар тарихига хос деб баҳолаганди.
Мамлакат соғлиқни сақлаш вазири Олег Ляшко 3 март, сешанба куни, Новие Санжари қишлоғида карантинда ушлаб турилган фуқароларда инфекция аниқланмагани, 5 март, пайшанба куни, кузатув муддати тугаб, уйларига жавоб берилишини маълум қилган.