«Илм, маърифат ва рақамли иқтисодиётни ривожлантириш йили» давлат дастури «Контрразведка фаолияти тўғрисида»ги ва «Ташқи разведка тўғрисида»ги қонунлар лойиҳаларини ишлаб чиқиш бўйича тадбирларни ўз ичига олмаган, деб хабар берди «Gazeta.uz».
Президентнинг давлат дастурини тасдиқлаш тўғрисидаги фармони лойиҳасида ушбу қонун лойиҳалари 1 июлгача ишлаб чиқилиши кўзда тутилган эди.
Фармонда ҳужжатлар лойиҳаларини яратиш Давлат хавфсизлик хизмати (ДХХ), шунингдек, тегишли вазирлик ва идоралар зиммасига юклатилиши айтилган эди.
Қонун лойиҳаларида контрразведка ва ташқи разведка фаолиятининг асосий тушунчалари, тамойиллари, вазифалари ва ҳуқуқий асослари, ушбу соҳадаги ахборотни йиғиш ва улардан фойдаланиш тартиби ва бошқалар назарда тутилган бўлиши керак эди.
Шу билан бирга, тасдиқланган давлат дастурида 2020 йил давомида мудофаа вазирлиги, миллий гвардия ва ДХХ хорижий ҳамкорлар билан ҳарбий ва ҳарбий-техникавий ҳамкорликни ривожлантириш бўйича чора-тадбирлар кўриши лозим бўлган банд сақланиб қолган.
Хусусан, Покистон ҳукумати ва Мудофаа вазирлиги билан ҳарбий ҳамкорлик ва ҳарбий разведка соҳасида ўзаро англашув меморандуми, Тожикистон мудофаа вазирлиги билан ҳарбий разведка соҳасида ҳамкорлик тўғрисидаги англашув меморандуми ва Қозоғистон билан ҳарбий разведка соҳасида ҳамкорлик тўғрисидаги битим имзоланиши кутилмоқда.
1 сентябрга қадар кибер кенгликда жиноятчиликка қарши курашни тартибга солиш, кибер ҳужумлардан муҳим инфратузилмани ҳимоя қилиш соҳасида ягона киберхавфсизлик тизими ва ҳуқуқий базани шакллантириш масалаларини қамраб олувчи 2020—2023 йилларга мўлжалланган миллий киберхавфсизлик стратегиясини ишлаб чиқиш режалаштирилмоқда.
Изоҳ (0)