Қашқадарё вилояти Миришкор тумани ҳокими Бахтиёр Ражабов эгаллаб турган лавозимидан озод этилди. Бу ҳақда айни пайтда бўлиб ўтаётган халқ депутатлари Миришкор туман кенгашининг навбатдан ташқари сессиясида маълум қилинди, дея хабар бермоқда «Дарё» мухбири Отабек Қўлдошев.
Қайд этилишича, Бахтиёр Ражабовнинг ўзи ишдан бўшаш ҳақида ариза ёзган. Сессияда Президент маслаҳатчиси Шерзод Кудбиев, маҳалла ва оилани қўллаб-қувватлаш вазири Раҳмат Маматов ва Қашқадарё вилояти ҳокими Зоир Мирзаев иштирок этмоқда.
Сессияда нутқ сўзлаган вилоят ҳокими Зоир Мирзаев Бахтиёр Ражабовни халқ билан ҳисоблашмасликда айблаган.
«Бахтиёр Ражабов адашди. Аммо шундай яхши кадрни йўқотаётганимиз ачинарли. Мен ҳокимларни огоҳлантиргандим, аммо натижа йўқ. Ҳокимият биноси ҳақорат сўзларни ишлатиш ёки кимнидир сўкиш учун қуриб берилмаган», — деди Зоир Мирзаев.
Бунга қадар Қарши туман ҳокими лавозимида фаолият юритган Ғайрат Бегалиев Миришкор тумани ҳокими лавозимига тавсия этилган.
Қўшимча қилишларича, Миришкор тумани ҳокими билан бирга туман прокурори ҳам ишдан олинган — шу вақтгача Миришкор тумани прокурори лавозимида ишлаб келган Жасур Турсунов ўрнига Акромхон Бобохонов тайинланган.
Йиғилишда вилоят ҳокимлиги томонидан тузилган ишчи гуруҳ Миришкорни барча соҳалар бўйича ўрганиб чиқиши маълум қилинган. «Миришкор туманини оталиққа оламиз», — деб таъкидлаган вилоят ҳокими Зоир Мирзаев.
Эслатиб ўтамиз, 2 март куни ижтимоий тармоқларда Қашқадарё вилояти Миришкор тумани ҳокими Бахтиёр Ражабовга тегишли аудиоёзув тарқалди. Аудиоёзувдан маълум бўлишича, воқеа туман ҳокими ва маҳалла раислари иштирокидаги йиғилишда бўлиб ўтган.
Аудиоёзувда ҳоким йиғилиш иштирокчиларини солиқ тушумларини ўз вақтида таъминламагани учун турли сўзлар билан ҳақоратлагани ва сўккани, шунингдек, баъзиларни ургани эшитилади.
Аудиоёзув бўйича Қашқадарё вилояти ҳокимлиги муносабат билдириб, овоз ҳақиқатдан ҳам Миришкор туман ҳокимига тегишли эканлигини тан олди.
Кейинроқ Бахтиёр Ражабов «Дарё» мухбири билан бўлган мулоқотда ижтимоий тармоқларда тарқалган овоз унга тегишли эканлигини тан олиб, мазкур қилмишини маҳалла раисининг беписанд муомаласи билан изоҳлади. «Йиғилишда сўкинганим рост, аммо ҳеч кимга қўл кўтармадим», — деганди ҳоким.
Олий Мажлис Қонунчилик палатаси депутати Расул Кушербаев ўзининг Telegram’даги канали орқали мазкур воқеага муносабат билдириб, «Ким бўлишидан қатъи назар тубан инсон эканлигини намоён этибди» деди. Қашқадарё вилояти ҳокими Зоир Мирзаев эса Миришкорнинг зўравон ҳокими вилоят номига доғ туширганини айтди.
Изоҳ (0)