Андижон вилоятининг Бўстон (собиқ Бўз) туманига Садбархон Неъматжоновна Мамитова ҳоким этиб тайинланди. Бу ҳақда Андижон вилояти ҳокимлиги ахборот хизмати «Дарё»га маълум қилди.
4 март куни Андижон вилояти Бўстон туманида бўлиб ўтган фаоллар йиғилишида 2018 йил августидан бери туманга раҳбарлик қилиб келган Иномжон Мамадалиев бошқа ишга ўтгани муносабати билан, унинг ўрнига Садбархон Мамитова туман ҳокими этиб тайинлангани маълум қилинган.
Маълумот учун, Садбархон Мамитова 1966 йилда Андижоннинг Жалақудуқ туманида туғилган, 1982—1986 йилларда Наманган қишлоқ хўжалиги техникумида ўқиган, 1993 йил Тошкент давлат аграр университетини (сиртқи) тамомлаган. У турли йилларда Жалақудуқ туманида турли лавозимларда меҳнат қилган
Хусусан, 2007—2008 йилларда туман ҳокими ўринбосари — туман хотин-қизлар қўмитаси раиси бўлган, 2011—2017 йилларда Жалақудуқ тумани Бандликка кўмаклашиш маркази директори лавозимларида ишлаган. 2019 йилдан «Юксалиш» умуммиллий ҳаракати Андижон вилояти ҳудудий бўлими раҳбари эди.
«Дарё» мухбирининг қайд этишича, Бўстон туманига ҳоким этиб тайинланган Садбархон Мамитова 1993—2005 йилларда Жалақудуқ туманига раҳбарлик қилган Манзура Эгамованинг шогирди ҳисобланади. Садбархон Мамитова ўқишни битириб келганидан сўнг, бевосита Манзура Эгамованинг қўл остида ишлаб, раҳбарлик лавозимларига кўтарилган.
Аввалроқ Сирдарё вилоятининг Боёвут туманига Дилфуза Ўролова, Бухоро вилоятининг Олот туманига эса Наргиза Неъматова ҳоким этиб тайинланган эди. Бу кўп йиллик танаффусдан сўнг Ўзбекистон ҳудудларига аёлларни раҳбар этиб тайинлаш билан боғлиқ дастлабки ҳолатлар бўлди.
Мавзуга доир:
Изоҳ (0)