Андижон вилоятининг Асака туманига шу кунга қадар Бўстон туманини бошқариб келган Иномжон Мамадалиев янги ҳоким этиб тайинланди. Бу масала халқ депутатлари Асака туман кенгашининг 4 март куни бўлиб ўтган навбатдан ташқари сессиясида кўриб чиқилди, дея хабар бермоқда «Дарё» мухбири.
Йиғилишда 2017 йилнинг июлидан буён Асака туманига раҳбарлик қилиб келаётган Эркинжон Ёқубов бошқа ишга ўтиши муносабати билан лавозимидан озод қилингани эълон қилинган. Туманнинг янги раҳбари сифатида шу вақтгача Бўстон (собиқ Бўз) туманига ҳокимлик қилган Иномжон Мамадалиев таништирилган.
Иномжон Мамадалиев 1975 йилнинг 24 январь куни Асака туманида туғилган, 1997 йилда Андижон давлат университети журналистика факультетини тамомлаган. Турли йилларда Асака шаҳар ИИБ катта инспектори, бўлим бошлиғи ўринбосари, вилоят ИИБда бошқарма бошлиғи лавозимларида ишлаган.
2014—2018 йиллар давомида Асака тумани ҳокимининг биринчи ўринбосари — Асака шаҳар ҳокими сифатида меҳнат фаолиятини олиб борган. У 2018 йилнинг августидан шу кунга қадар ҳозирги Бўстон (собиқ Бўз) туманига ҳокимлик қилди. Аввалроқ Бўстон туманига Садбархон Мамитова ҳоким этиб тайинлангани ҳақида хабар берилган эди.
Тасдиқланмаган маълумотларга кўра, яқин вақт ичида Асака туманининг собиқ раҳбари Эркинжон Ёқубов вилоятнинг Улуғнор туманига ҳоким этиб тайинланиши кутилмоқда.
Изоҳ (0)