“Ilm, ma’rifat va raqamli iqtisodiyotni rivojlantirish yili” davlat dasturi “Kontrrazvedka faoliyati to‘g‘risida”gi va “Tashqi razvedka to‘g‘risida”gi qonunlar loyihalarini ishlab chiqish bo‘yicha tadbirlarni o‘z ichiga olmagan, deb xabar berdi “Gazeta.uz”.
Prezidentning davlat dasturini tasdiqlash to‘g‘risidagi farmoni loyihasida ushbu qonun loyihalari 1-iyulgacha ishlab chiqilishi ko‘zda tutilgan edi.
Farmonda hujjatlar loyihalarini yaratish Davlat xavfsizlik xizmati (DXX), shuningdek, tegishli vazirlik va idoralar zimmasiga yuklatilishi aytilgan edi.
Qonun loyihalarida kontrrazvedka va tashqi razvedka faoliyatining asosiy tushunchalari, tamoyillari, vazifalari va huquqiy asoslari, ushbu sohadagi axborotni yig‘ish va ulardan foydalanish tartibi va boshqalar nazarda tutilgan bo‘lishi kerak edi.
Shu bilan birga, tasdiqlangan davlat dasturida 2020-yil davomida mudofaa vazirligi, milliy gvardiya va DXX xorijiy hamkorlar bilan harbiy va harbiy-texnikaviy hamkorlikni rivojlantirish bo‘yicha chora-tadbirlar ko‘rishi lozim bo‘lgan band saqlanib qolgan.
Xususan, Pokiston hukumati va Mudofaa vazirligi bilan harbiy hamkorlik va harbiy razvedka sohasida o‘zaro anglashuv memorandumi, Tojikiston mudofaa vazirligi bilan harbiy razvedka sohasida hamkorlik to‘g‘risidagi anglashuv memorandumi va Qozog‘iston bilan harbiy razvedka sohasida hamkorlik to‘g‘risidagi bitim imzolanishi kutilmoqda.
1-sentabrga qadar kiber kenglikda jinoyatchilikka qarshi kurashni tartibga solish, kiber hujumlardan muhim infratuzilmani himoya qilish sohasida yagona kiberxavfsizlik tizimi va huquqiy bazani shakllantirish masalalarini qamrab oluvchi 2020—2023-yillarga mo‘ljallangan milliy kiberxavfsizlik strategiyasini ishlab chiqish rejalashtirilmoqda.
Izoh (0)