Малайзиянинг собиқ бош вазири, ҳукумат раҳбари вазифасини вақтинчалик бажараётган Маҳатхир Муҳаммад яна бош вазир лавозимини эгаллашга тайёрлигини ва бунинг учун депутатларнинг етарли овозига эгалигини айтди. У 24 февраль куни истеъфога чиққанди.
«РБК»нинг The Star газетасига таяниб хабар беришича, уни «Умид альянси» ҳукумат коалицияси қўллаб-қувватламоқда. «Парламент депутатларининг аксарияти мени бош вазир лавозимига номзод сифатида қўллаб-қувватламоқда», — деган у.
Маҳатхир Муҳаммад шанба куни эрталаб «Умид альянси» депутатлари билан учрашганини ва уларнинг қўллаб-қувватлашини қабул қилганини тан олган. «Бугун бу ҳақда зоти олияларига расман хабар берамиз», — деб таъкидлаган сиёсатчи.
«ТАСС»нинг ёзишича, Маҳатхир «Агар менга ижозат берса, мен миллий манфаатларни ҳамма нарсадан устун қўядиган ҳукуматни яратаман», деб айтган. Унинг айтишича, аввалги таркибдаги ҳукумат аъзолари коронавирус сабабли юзага келган давлатга таҳдид солувчи муаммолар, иқтисодий қийинчиликларга дуч келганини унутган.
Айни пайтда Маҳатҳир ҳукумат бошлиғи фаолиятини давом эттириш учун энг кўп имкониятга эга, аммо мустақил депутатларнинг бир қисми «Адолат халқ партияси» раҳбари Анвар Иброҳимни қўллаб-қувватласа, вазият ўзгариши мумкин.
Маҳатхир Муҳаммад 1925 йилда туғилган. У 1981—2003 йиларда Малайзия ҳукуматига раҳбарлик қилган. У 2018 йили мухолифотдаги коалиция номидан ҳукумат раҳбари лавозимини эгаллаган эди. Ушбу воқеа арафасида Маҳатхир парламент сайловларида ғолиб чиқадиган бўлса, фақат икки йилга бош вазир бўлиши, сўнг ушбу лавозимни «Адолат» халқ партияси етакчиси Анвар Иброҳим эгаллашига келишиб олган эди.
Изоҳ (0)