Malayziya bosh vaziri Mahatxir Muhammad iste’foga chiqdi. Bu haqda Malayziya hukumati rahbarining bayonotiga asoslanib, “RBK” xabar bermoqda.

Foto: Global Look Press

Bayonotda ta’kidlanishicha, bosh vazir Malayziya qiroliga iste’foga chiqarish haqidagi iltimosnomani yo‘llagan. Boshqa tafsilotlar ma’lum qilinmayapti.

Avvalroq yetakchisi Mahatxir Muhammad bo‘lgan Malayziya yerlarining farzandlari birlashgan partiyasi “Umid alyansi” hukumat koalitsiyasi tarkibidan chiqib ketgan edi.

Reuters agentligi vaziyatdan boxabar uchta manbaga asoslanib xabar berishicha, Mahatxir Muhammadning o‘zi ham o‘z partiyasi tarkibidan chiqadi.

Mahatxir Muhammad 1925-yilda tug‘ilgan. U 1981—2003-yilarda Malayziya hukumatiga rahbarlik qilgan. U 2018-yili muxolifotdagi koalitsiya nomidan hukumat rahbari lavozimini egallagan edi. Ushbu voqea arafasida Mahatxir parlament saylovlarida g‘olib chiqadigan bo‘lsa, faqat ikki yilga bosh vazir bo‘lishi, so‘ng ushbu lavozimni “Adolat” xalq partiyasi yetakchisi Anvar Ibrohim egallashiga kelishib olingan edi.

O‘sha vaqtda Anvar Ibrohim besoqolbozlikda ayblanib, qamoqqa olingan edi. “Umid alyansi”ning parlament saylovidagi g‘alabasidan so‘ng, Malayziya qiroli Muhammad Beshinchi Anvar Ibrohimni afv etdi va unga davlat lavozimlarini egallashga ruxsat berdi.