Жанубий Кореяда янги турдаги COVID-2019 коронавируси билан касалланган яна 594 та янги ҳолат қайд этилди. Шундай қилиб мамлакатда вирусни юқтириб олганларнинг умумий сони 2931 кишига етди, яна 3 киши вафот этди. Бу ҳақда Корея касалликлар профилактикаси ва назорати марказига таяниб, «РИА Новости» хабар берди.
Аввалроқ Жанубий Кореяда эпидемиология хавфи тўртинчи — «қизил» даражага кўтарилгани, коронавирус тарқалиш хавфи юзасидан мамлакатда сафарбарлик эълон қилингани ҳақида хабар берилганди.
Маълумотларга кўра, вирусни юқтириб олганларнинг 476 нафари Тэгу шаҳри, яна 60 нафари Кёнсан-Пукто провинциясига, қолганлари мамлакатнинг турли ҳудудларида тўғри келмоқда.
Коронавирус оқибатида вафот этганлар сони 16 кишини, даволанишга муваффақ бўлганлар 27 кишини ташкил этмоқда. Шунингдек, 29 154 кишининг таҳлил натижалари кутилмоқда. Ҳарбий хизматчилар орасидан 27 нафарида ҳам коронавирус аниқланган.
Қайд этилишича, Жанубий Корея ҳукумати Тэгу шаҳрида вирус тарқалишининг марказига айланган диний ташкилотдаги яна 250 мингдан ортиқ кишини коронавирусга текширишни бошлагани сабабли яқин кунларда мамлакатдаги касалланиш ҳолатлари ортиши кутилмоқда.
Эслатиб ўтамиз, Тэгу шаҳрида вирус билан касалланган 61 ёшли аёл Синчхонжи диний ташкилотига келиб, ўзи билмаган ҳолда минглаб одамларга уни юқтирган эди. Шу сабабли Жанубий Кореяни жаҳондаги учинчи энг йирик коронавирус ўчоғига айлантирган ушбу ташкилотни ёпиш талаб этилган.
Айни пайтда Тэгу ва Кёнсан-Пукто провинцияси махсус эпидемиологик назорат ҳудудлари деб эълон қилинган.
Изоҳ (0)