Consort хусусий бандлик агентлигига Ўзбекистондан ташқарида иш излаётган шахсларни ишга жойлаштириш фаолияти билан шуғулланиш учун берилган лицензиянинг амал қилиши вақтинчалик тўхтатилди, дея хабар бермоқда Бандлик ва меҳнат муносабатлари вазирлиги матбуот хизмати.
Маълум бўлишича, вазирлик ҳузуридаги Ташқи меҳнат миграцияси агентлигига Consort хусусий бандлик агентлиги фаолияти устидан кўплаб фуқаролардан шикоят аризалари келиб тушган. Шу муносабат билан вазирлик агентлик лицензиясининг амал қилишини 10 иш куни муддатига тўхтатиш тўғрисида қарор қабул қилган.
«10 кун давомида Consort хусусий бандлик агентлиги томонидан Ўзбекистондан ташқарида иш излаётган шахсларни ишга жойлаштириш бўйича фаолиятини лицензиялаш тартиби тўғрисидаги низомининг 46-бандига биноан келтирилган ҳолатларни ижобий ҳал қилиш талаб қилинади», — дейилади вазирлик ахборотида.
Аввалроқ International Experience хусусий бандлик агентлиги Германия, Чехия, Литва каби давлатларда ишга жойлаштириш учун фуқаролардан 50 минг доллардан зиёд пул олгани, бироқ шартнома шартларини бажармагани учун лицензияси 10 кунга тўхтатилгани ҳақида хабар берилган эди.
Хусусий бандлик агентликлари билан боғлиқ вазият ҳақида
Ўзбекистонда хусусий бандлик агентликлари тўғрисидаги қонун 2018 йил октябрь ойида кучга кирган эди. 2019 йил кузидан бери Human, Korean and migrations ва бошқа хусусий бандлик агентликларининг раҳбарларига нисбатан фирибгарлик моддаси бўйича жиноят ишлари қўзғатилгани ҳақида хабарлар пайдо бўлди (маълумотларга кўра, саккизта агентликка қарши жиноят ишлари қўзғатилган).Мавзуга доир: Ўзбекистонда яна бир хусусий бандлик агентлиги фуқароларни 2,6 млрд сўмга чув туширгани аниқланди
Ўз навбатида, Бандлик ва меҳнат муносабатлари вазирлиги қонунга ўзбекистонликларни хорижда ишга жойлаштириш бўйича виждонсиз хизмат кўрсатилишидан ҳимоя қила оладиган тузатишларни киритиш ниятини билдирган эди.
17 февраль, душанба куни, Ўзбекистоннинг турли ҳудудларидан келган 100 га яқин одам Тошкентдаги Мустақиллик майдонида йиғилиб, Human агентлиги томонидан етказилган зарарнинг қоплаб берилишини талаб қилган эди. Улар билан дастлаб бош вазир ўринбосари Азиз Абдуҳакимов ҳамда бандлик ва меҳнат муносабатлари вазири Нозим Ҳусанов учрашди.
Кейинроқ норози фуқаролар билан Ўзбекистон бош вазири Абдулла Арипов ҳам учрашди. Учрашув якунларига кўра, ҳукумат раҳбари Human бандлик агентлиги томонидан фуқароларга етказилган 21 миллиард сўм (тахминан 2,2 миллион доллар) миқдоридаги зарарни вазирлик ҳузуридаги бюджетдан ташқари фонд ҳисобидан вақтинча қоплаб туриш ҳақида топшириқ берди.
Изоҳ (0)