Деҳқонободда 3 нафар шахс сурхондарёлик фуқарони тунади. Бу ҳақда «Дарё»га Деҳқонобод ИИБ бошлиғи ўринбосари Дилшод Мирзаев хабар берди.
Дилшод Мирзаевнинг маълумот беришича, деҳқонободлик 25 ёшли А.Н. ўзганинг мулкини очиқдан-очиқ талон-торож қилиш мақсадида танишлари Ж.С. ва О.Ж.лар билан ўзаро олдиндан жиноий тил бириктириб, бир гуруҳга бирлашган.
2020 йил 21 февраль куни спиртли ичимлик истеъмол қилиб, мўмай даромад орттиришни кўзлаган. Ва соат тахминан 23:00 ларда туманнинг «Янгиқишлоқ» маҳалла фуқаролар йиғини ҳудудида Nexia автомобилида «Термиз—Тошкент» йўналишида ҳаракатланиб кетаётган Фарҳод Юсуповнинг Isuzi автомашинасини тўхтатган. Зўравонлик билан ҳайдовчига тегишли, бозор баҳоси 300 минг сўмлик телефон аппарати, шаҳарлараро рухсат берувчи юк хати, 180 минг сўм миқдордаги нақд пул ва 6 дона карам маҳсулотини очиқдан-очиқ талон-торож қилиб, ҳодиса содир бўлган жойдан яширинган.
Олиб борилган тезкор тадбирлар давомида ушбу жиноят фош этилган. Жиноятга қўл урган ёшларнинг қилмиши эса маҳалла масъуллари ва жамоатчилик билан муҳокама қилинган.
Мазкур ҳолат юзасидан туман ИИБ ҳузуридаги Тергов бўлими томонидан Ўзбекистон Республикаси Жиноят кодексининг 166-моддаси 2-қисми «в» банди (Талончилик) билан жиноят иши қўзғатилган ва гумондор процессуал тартибда ушланган.
Ҳозирда дастлабки тергов ҳаракатлари давом этмоқда.
Изоҳ (0)