Consort xususiy bandlik agentligiga O‘zbekistondan tashqarida ish izlayotgan shaxslarni ishga joylashtirish faoliyati bilan shug‘ullanish uchun berilgan litsenziyaning amal qilishi vaqtinchalik to‘xtatildi, deya xabar bermoqda Bandlik va mehnat munosabatlari vazirligi matbuot xizmati.
Ma’lum bo‘lishicha, vazirlik huzuridagi Tashqi mehnat migratsiyasi agentligiga Consort xususiy bandlik agentligi faoliyati ustidan ko‘plab fuqarolardan shikoyat arizalari kelib tushgan. Shu munosabat bilan vazirlik agentlik litsenziyasining amal qilishini 10 ish kuni muddatiga to‘xtatish to‘g‘risida qaror qabul qilgan.
“10 kun davomida Consort xususiy bandlik agentligi tomonidan O‘zbekistondan tashqarida ish izlayotgan shaxslarni ishga joylashtirish bo‘yicha faoliyatini litsenziyalash tartibi to‘g‘risidagi nizomining 46-bandiga binoan keltirilgan holatlarni ijobiy hal qilish talab qilinadi”, — deyiladi vazirlik axborotida.
Avvalroq International Experience xususiy bandlik agentligi Germaniya, Chexiya, Litva kabi davlatlarda ishga joylashtirish uchun fuqarolardan 50 ming dollardan ziyod pul olgani, biroq shartnoma shartlarini bajarmagani uchun litsenziyasi 10 kunga to‘xtatilgani haqida xabar berilgan edi.
Xususiy bandlik agentliklari bilan bog‘liq vaziyat haqida
O‘zbekistonda xususiy bandlik agentliklari to‘g‘risidagi qonun 2018-yil oktabr oyida kuchga kirgan edi. 2019-yil kuzidan beri Human, Korean and migrations va boshqa xususiy bandlik agentliklarining rahbarlariga nisbatan firibgarlik moddasi bo‘yicha jinoyat ishlari qo‘zg‘atilgani haqida xabarlar paydo bo‘ldi (ma’lumotlarga ko‘ra, sakkizta agentlikka qarshi jinoyat ishlari qo‘zg‘atilgan).Mavzuga doir: O‘zbekistonda yana bir xususiy bandlik agentligi fuqarolarni 2,6 mlrd so‘mga chuv tushirgani aniqlandi
O‘z navbatida, Bandlik va mehnat munosabatlari vazirligi qonunga o‘zbekistonliklarni xorijda ishga joylashtirish bo‘yicha vijdonsiz xizmat ko‘rsatilishidan himoya qila oladigan tuzatishlarni kiritish niyatini bildirgan edi.
17-fevral, dushanba kuni, O‘zbekistonning turli hududlaridan kelgan 100 ga yaqin odam Toshkentdagi Mustaqillik maydonida yig‘ilib, Human agentligi tomonidan yetkazilgan zararning qoplab berilishini talab qilgan edi. Ular bilan dastlab bosh vazir o‘rinbosari Aziz Abduhakimov hamda bandlik va mehnat munosabatlari vaziri Nozim Husanov uchrashdi.
Keyinroq norozi fuqarolar bilan O‘zbekiston bosh vaziri Abdulla Aripov ham uchrashdi. Uchrashuv yakunlariga ko‘ra, hukumat rahbari Human bandlik agentligi tomonidan fuqarolarga yetkazilgan 21 milliard so‘m (taxminan 2,2 million dollar) miqdoridagi zararni vazirlik huzuridagi budjetdan tashqari fond hisobidan vaqtincha qoplab turish haqida topshiriq berdi.
Izoh (0)