Урганч шаҳрида 25—26 февраль кунлари бўлиб ўтган Иккинчи минтақалараро ҳамкорлик форуми доирасида Ўзбекистон ва Қозоғистон ўртасида умумий қиймати 500 миллион доллар бўлган 30 та келишув имзоланди. Бу ҳақда Ўзбекистон бош вазири Абдулла Арипов қозоғистонлик ҳамкасби Асқар Мамин билан учрашувдан сўнг маълум қилди, деб ёзмоқда «Gazeta.uz».
Абдулла Арипов 2019 йилда Ўзбекистон ва Қозоғистон ўртасидаги ўзаро савдо ҳажми 4,1 миллиард долларга етганини таъкидлади. Икки мамлакатнинг жорий йилги мақсади ўзаро савдо ҳажмини 5 миллиард долларга етказиш ва ўрта муддатли истиқболда бу рақамни 10 миллиард долларга чиқариш ҳисобланади.
Ўзбекистон бош вазирининг сўзларига кўра, бугунги кунда Ўзбекистонда Қозоғистон капитали иштирокида 827 та корхона фаолият кўрсатмоқда, уларнинг 300 дан ортиғи ўтган йилнинг ўзида тузилган.
Абдулла Арипов жорий йилда икки мамлакат ҳукуматлараро комиссия ва ишбилармонлар кенгаши йиғилишини ўтказиш кераклигини айтди. Шунингдек, бош вазир ҳар икки мамлакатда таълим кунларни ўтказишни, шунингдек, фан ва соғлиқни сақлаш соҳасида фаол ҳамкорликни давом эттиришни таклиф қилди.
Форумда сўзга чиққан Қозоғистон бош вазири Асқар Мамин қўшни мамлакатнинг Ўзбекистонга қатор таклифларини ҳам билдирди.
Хусусан, у Чимкентдаги «Онтустик» махсус иқтисодий зонаси негизида Қозоғистон—Ўзбекистон енгил саноат кластерини ривожлантириш бўйича ишларни давом эттириш ва Қозоғистоннинг Туркистон вилояти, шунингдек, Тошкент, Самарқанд, Бухоро ва Хоразм вилоятларининг диққатга сазовор жойлари бўйлаб сайёҳлик йўналишини яратиш таклифини билдирди.
Асқар Маминнинг сўзларига кўра, Қозоғистон улгуржи савдо ва логистика марказлари тармоғини яратмоқда, бу маҳсулотларни етказиб бериш занжирини оптималлаштирмоқда ва уни сақлаш ҳамда тарқатиш учун зарур шарт-шароитларни яратмоқда.
«Биз мамлакатларимиз инфратузилмасини интеграциялаштиришни таклиф қилмоқдамиз. Қишлоқ хўжалиги ишлаб чиқарувчиларини ўз маҳсулотларини учинчи мамлакатлар бозорларига экспорт қилишда инфраструктуралардан фойдаланишга фаол жалб қилишни таклиф этамиз. Бу қишлоқ хўжалиги маҳсулотларини ўзаро етказиб беришни таъминлайди, маҳсулотимизни истиқболли бозорларга экспорт қилишни ташкил этади ва Марказий Осиё ишлаб чиқарувчиларининг қўшма бирлашмасини яратади,» — деди Асқар Мамин.
Бундан ташқари, Асқар Мамин икки мамлакатнинг халқаро юк ва йўловчилар оқимини кенгайтириш ва хизмат кўрсатиш даражаси, транспорт йўналишларининг сифатини халқаро стандартларга мувофиқ ошириш бўйича ҳамкорликдаги ишларни кучайтириш зарурлигини таъкидлади.
«Биз Қозоғистон—Ўзбекистон чегарасида Марказий Осиёнинг савдо-иқтисодий ҳамкорлиги марказини яратишга катта аҳамият беряпмиз. Биз ҳозиргина 14 март куни бўлғуси марказнинг қурилиш майдонига биргаликда ташриф буюришга келишиб олдик,» — деди Қозоғистон ҳукумати раҳбари.
Бундан ташқари, Асқар Мамин Ўзбекистон транспорт компанияларини Транскаспий халқаро транспорт йўналишлари ассоциациясига қўшилишга таклиф қилди.
Ушбу лойиҳа юкларни Кавказ, Туркия ва Жанубий Европа мамлакатларига етказиб бериш учун транспорт хизматларини кўрсатади, темир йўл ва порт маъмурлари, шунингдек, Хитой, Озарбайжон, Грузия, Туркия, Украина ва Польшанинг логистика компанияларини бирлаштиради.
Асқар Маминнинг маълум қилишича, Қозоғистон, ўз навбатида, Ўзбекистон товарларини ўз ҳудуди орқали ташишда қулай тариф сиёсатини давом эттиради.
Изоҳ (0)