Urganch shahrida 25—26-fevral kunlari bo‘lib o‘tgan Ikkinchi mintaqalararo hamkorlik forumi doirasida O‘zbekiston va Qozog‘iston o‘rtasida umumiy qiymati 500 million dollar bo‘lgan 30 ta kelishuv imzolandi. Bu haqda O‘zbekiston bosh vaziri Abdulla Aripov qozog‘istonlik hamkasbi Asqar Mamin bilan uchrashuvdan so‘ng ma’lum qildi, deb yozmoqda “Gazeta.uz”.
Abdulla Aripov 2019-yilda O‘zbekiston va Qozog‘iston o‘rtasidagi o‘zaro savdo hajmi 4,1 milliard dollarga yetganini ta’kidladi. Ikki mamlakatning joriy yilgi maqsadi o‘zaro savdo hajmini 5 milliard dollarga yetkazish va o‘rta muddatli istiqbolda bu raqamni 10 milliard dollarga chiqarish hisoblanadi.
O‘zbekiston bosh vazirining so‘zlariga ko‘ra, bugungi kunda O‘zbekistonda Qozog‘iston kapitali ishtirokida 827 ta korxona faoliyat ko‘rsatmoqda, ularning 300 dan ortig‘i o‘tgan yilning o‘zida tuzilgan.
Abdulla Aripov joriy yilda ikki mamlakat hukumatlararo komissiya va ishbilarmonlar kengashi yig‘ilishini o‘tkazish kerakligini aytdi. Shuningdek, bosh vazir har ikki mamlakatda ta’lim kunlarni o‘tkazishni, shuningdek, fan va sog‘liqni saqlash sohasida faol hamkorlikni davom ettirishni taklif qildi.
Forumda so‘zga chiqqan Qozog‘iston bosh vaziri Asqar Mamin qo‘shni mamlakatning O‘zbekistonga qator takliflarini ham bildirdi.
Xususan, u Chimkentdagi “Ontustik” maxsus iqtisodiy zonasi negizida Qozog‘iston—O‘zbekiston yengil sanoat klasterini rivojlantirish bo‘yicha ishlarni davom ettirish va Qozog‘istonning Turkiston viloyati, shuningdek, Toshkent, Samarqand, Buxoro va Xorazm viloyatlarining diqqatga sazovor joylari bo‘ylab sayyohlik yo‘nalishini yaratish taklifini bildirdi.
Asqar Maminning so‘zlariga ko‘ra, Qozog‘iston ulgurji savdo va logistika markazlari tarmog‘ini yaratmoqda, bu mahsulotlarni yetkazib berish zanjirini optimallashtirmoqda va uni saqlash hamda tarqatish uchun zarur shart-sharoitlarni yaratmoqda.
“Biz mamlakatlarimiz infratuzilmasini integratsiyalashtirishni taklif qilmoqdamiz. Qishloq xo‘jaligi ishlab chiqaruvchilarini o‘z mahsulotlarini uchinchi mamlakatlar bozorlariga eksport qilishda infrastrukturalardan foydalanishga faol jalb qilishni taklif etamiz. Bu qishloq xo‘jaligi mahsulotlarini o‘zaro yetkazib berishni ta’minlaydi, mahsulotimizni istiqbolli bozorlarga eksport qilishni tashkil etadi va Markaziy Osiyo ishlab chiqaruvchilarining qo‘shma birlashmasini yaratadi,” — dedi Asqar Mamin.
Bundan tashqari, Asqar Mamin ikki mamlakatning xalqaro yuk va yo‘lovchilar oqimini kengaytirish va xizmat ko‘rsatish darajasi, transport yo‘nalishlarining sifatini xalqaro standartlarga muvofiq oshirish bo‘yicha hamkorlikdagi ishlarni kuchaytirish zarurligini ta’kidladi.
“Biz Qozog‘iston—O‘zbekiston chegarasida Markaziy Osiyoning savdo-iqtisodiy hamkorligi markazini yaratishga katta ahamiyat beryapmiz. Biz hozirgina 14-mart kuni bo‘lg‘usi markazning qurilish maydoniga birgalikda tashrif buyurishga kelishib oldik,” — dedi Qozog‘iston hukumati rahbari.
Bundan tashqari, Asqar Mamin O‘zbekiston transport kompaniyalarini Transkaspiy xalqaro transport yo‘nalishlari assotsiatsiyasiga qo‘shilishga taklif qildi.
Ushbu loyiha yuklarni Kavkaz, Turkiya va Janubiy Yevropa mamlakatlariga yetkazib berish uchun transport xizmatlarini ko‘rsatadi, temir yo‘l va port ma’murlari, shuningdek, Xitoy, Ozarbayjon, Gruziya, Turkiya, Ukraina va Polshaning logistika kompaniyalarini birlashtiradi.
Asqar Maminning ma’lum qilishicha, Qozog‘iston, o‘z navbatida, O‘zbekiston tovarlarini o‘z hududi orqali tashishda qulay tarif siyosatini davom ettiradi.
Izoh (0)