Олий Мажлиснинг инсон ҳуқуқлари бўйича вакили Улуғбек Муҳаммадиев ҳуқуқ-тартибот органлари томонидан терговда қўлланиши иддао қилинаётган қийноқларга барҳам бериш учун ягона тергов қўмитасини тузиш таклифини билдирди. У бу ҳақда парламентга берган ҳисоботида қайд этган, деб ёзмоқда «Gazeta.uz».
Маълум қилинишича, Олий Мажлиснинг инсон ҳуқуқлари бўйича вакили — омбудсманга 2019 йилда келиб тушган мурожаатлар орасида шахсий ҳуқуқлар ва эркинликлар тоифасига мансуб шикоятлар кўп учраган. Хусусан, омбудсман манзилига 4800 дан ортиқ ушбу мазмундаги мурожаат келиб тушган.
Унинг айтишича, яшаш, эркинлик ва дахлсизлик ҳуқуқи, ўз шаъни ва обрўсига қилинган тажовузлардан ҳимояланиш ҳуқуқи, ҳуқуқ-тартибот органлари томонидан тезкор-қидирув фаолияти ҳамда ҳуқуқбузарликларнинг олдини олиш бўйича амалга оширилган ишлар билан боғлиқ мурожаатлар сони кўпайган.
«Парламент назорати субъекти сифатида 900 дан ортиқ шикоят назоратга олинди ва уларнинг 30 фоиздан ортиғи ижобий ечимга эга бўлган. Шикоятларни кўриб чиқиш натижасида 17 та ҳолат бўйича текширув ўтказилди, 24 та ҳолатда жиноят, 21 та ҳолатда маъмурий, 65 тасида эса интизомий ишлар қўзғатилди», — деди омбудсман.
Омбудсманнинг қайд этишича, турли вазирлик ва идоралар, хусусан, таълим муассасалари ходимларининг 28 нафари, Соғлиқни сақлаш вазирлигидан 15 нафар, ИИВ ходимларининг 20 нафари, 7 нафар МИБ ходими ва бошқа ташкилотлардан 15 нафар ходим жавобгарликка тортилди.
Муҳаммадиевнинг билдиришича, баъзи ҳолатларда тергов хонасида мавжуд ёзув камералари ўчириб қўйилган ёки махсус хонадан ташқарида қийноқларни қўллаб, айбланувчи тергов қилинган. Бундай ҳолатлар назоратга олинади, прокуратурага юборилади.
«Афсуски, ваколатли органлар жавобида мурожаатда кўрсатилган важлар ўз исботини топмагани айтилади. Шунинг учун, ўз ҳисоботимда алоҳида ва ягона тергов қўмитасини тузишни таклиф этдим. Парламент буни инобатга олиши мажбурий характерга эга эмас. Аммо энг кўп мурожаат ҳам терговга оид, қийноқлар қўлланиши ва ҳуқуқлар бузилиши мурожаатларда кўп такрорланяпти», — дея фикр билдирди омбудсман.
Бунга қадар «Адолат» СДП ҳам ушбу таклифни сайловолди кампаниясида билдирганди. Эндиликда партия ўз таклифини ижтимоий тармоқларда қайта эълон қилган.
Партия хабарига кўра, адолатсизлик адолатни таъминловчи идоралар томонидан содир этилса, бир неча карра оғриқли бўлади. Бу каби ҳолатлар ҳуқуқни муҳофаза қилувчи органларда амалга оширилган ислоҳотлар бугунги кун шиддатидан ортда қолаётганини англатади. Шунга мувофиқ, партия дастлабки тергов органларининг тарқоқлиги натижасида инсон ҳуқуқларининг бузилиши ҳолатлари юз бераётганлиги сайловчиларнинг ҳақли эътирозларига сабаб бўлишини эътироф этган.
«Ушбу ҳолатни бартараф қилиш мақсадида, ўз сайловолди дастурида мамлакатда ягона тергов органи — тергов қўмитасини ташкил этиш ташаббусини илгари сурганди. Бу каби ҳолатлар ушбу ташаббусни амалга ошириш вақти келганини кўрсатади», — дейилади хабарда.
Эслатиб ўтамиз, Қашқадарё вилоятининг Чироқчи туманида мол ўғирлашда гумон қилинган 32 ёшли эркак ИИБ ходимлари томонидан калтакланиши оқибатида 23 январь куни вафот этган эди. Кейинроқ ИИБнинг бошқа ходимлари ушбу жиноятни яшириш мақсадида гувоҳларга босим ўтказгани маълум бўлганди. Мазкур ҳолат юзасидан жиноят иши очилиб, икки нафар ИИБ ходими қамоққа олингани, уларга нисбатан жиноят иши очилгани ҳамда улардан бири ИИБ бошлиғи эканлиги ҳақида хабар берилган эди.
Мазкур воқеалар ортидан Қашқадарё вилоят ИИБ бошлиғининг биринчи ўринбосари Самад Турдиев ўз лавозимидан кетган.
Ўзбекистон Сенати Чироқчидаги мазкур қотилликнинг тергови бош прокурор томонидан назоратга олинганини маълум қилди.
Мазкур аянчли воқеа юзасидан Қашқадарё вилояти ИИБ биносида оммавий ахборот воситалари ходимлари учун ўтказилган махсус брифингда Ўзбекистон ички ишлар вазири матбуот котиби Шоҳрух Ғиёсов ИИБ биносида одам ўлими ҳолати янгилик эмаслигини таъкидлаб ўтган.
Шунингдек, Андижон вилятида ҳам шунга ўхшаш ҳолат кузатилди.
Изоҳ (0)