Миграция агентлиги Жанубий Кореяга кетиш шартлари ҳақида маълумот берди

Меҳнат вазирлиги ҳузуридаги Миграция агентлиги матбуот хизмати Жанубий Кореяга кетиш шартлари ҳақидаги маълумот берди.

Унга кўра, лаёқатли ишчи мақомини олган фуқаролар (VIP) қуйидаги талаблар бўйича сараланади ва Жанубий Кореяга ишга кетиш учун тест имтиҳонлари талаб қилинмаслик шартлари қуйидагича:

• Корея Республикасида 4 йил 10 ой бир корхонада меҳнат фаолиятини амалга оширган ва шартномаси тугагандан сўнг корхонадан қайта шартнома билан келган фуқаролар;
• бунда фуқаро биринчи меҳнат шартномасини тугатгандан сўнг ёши 39 ёшдан ошган бўлса ҳам қайта шартнома билан меҳнат фаолиятини амалга ошириши мумкин;
• хорижга чиқиш учун тақиқи бўлмаган ҳамда хорижга чиқиш паспорти мавжуд фуқаролар;
• ҳар томонлама соғлом, юқумли касалликка чалинмаган фуқаролар;
• Корея Республикаси ҳудудига киришга тақиқи йўқ фуқаролар;
• муқаддам судланмаган фуқаролар;
• Корея Республикасида 5 йилдан ортиқ муддатда ишламаган фуқаролар.

Фуқаро Жанубий Кореядан Ўзбекистон Республикаси ҳудудига кириб келган кундан бошлаб, 90 кун муддат ичида Корея Республикаси иш берувчиси билан келишилган ҳолда жўнаб кетиши зарур.

Фуқароларни Корея Республикасига ишга жўнатиш (E-9 ишчи виза) ҳуқуқига эга ягона ташкилот Ташқи меҳнат миграцияси агентлиги ҳисобланади, хусусий бандлик агентликларининг бунга ваколати йўқ.

Аввал Ўзбекистонда фуқароларни 24 млрд сўмга чув туширган бандлик агентлиги жиноий иши бўйича тергов тафсилотлар маълум қилинган. Шунингдек, 2019 йил октябрь ойида Бандлик ва меҳнат муносабатлари вазирлиги Korean and migrations хусусий бандлик агентлиги МЧЖга берилган Ўзбекистон фуқароларини хорижда ишга жойлаштириш фаолияти билан шуғулланишга рухсат этувчи 0010-сонли лицензия тўхтатилгани ҳамда шу йили ноябрда Ўзбекистонда фирибгарликда гумонланаётган Жанубий Корея фуқаросига жиноят иши қўзғатилгани ҳақида хабарлар берилган.