Президентнинг «Тошкент давлат иқтисодиёт университетида олий маълумотли кадрлар тайёрлаш тизимини тубдан такомиллаштириш чора-тадбирлари тўғрисида»ги қарори лойиҳаси жамоатчилик муҳокамаси учун эълон қилинди.

Таъкидланишича, Олий ва ўрта махсус таълим вазирлиги университет қошида давлат-хусусий шерикчилиги асосида мактабгача таълим муассасаси, ихтисослаштирилган умумтаълим мактаблари фаолиятини йўлга қўйиш бўйича ҳукумат қарори лойиҳасини тайёрлайди.

Айни вақтда Инновацион ривожланиш вазирлиги Молия вазирлиги ҳамда Олий ва ўрта махсус таълим вазирлиги билан ҳамкорликда университетда таянч докторантура учун қабул параметрларини икки мартага оширилишини таъминлайди.

Олий ва ўрта махсус таълим ҳамда Иқтисодиёт ва саноат вазирлигининг таклифига мувофиқ Васийлик кенгаши таркибига кирган идора ва ташкилотларида университетнинг соҳага оид тегишли кафедралари филиалларини ташкил этишга розилик берилади.

Шунингдек, университетдаги хорижий талабалар, илмий-тадқиқот ишларини амалга ошириш, илмий-назарий маърузалар ўқиш, дарс машғулотларини олиб бориш учун таклиф этиладиган чет эллик профессор-ўқитувчилар, олимлар ва мутахассисларга кўп марталик кириш визаларини давлат божларини тўлашдан озод этган ҳамда консуллик ва бошқа йиғимларни ундирмаган ҳолда берилиши ва узайтирилиши, Ўзбекистондаги вақтинча яшаш жойида вақтинча рўйхатдан ўтказилиши йўлга қўйилиши мумкин.

Ўзбекистон Республикаси Олий ва ўрта махсус таълим вазирлиги Адлия вазирлиги билан биргаликда норматив-ҳуқуқий ҳужжатларга ушбу қарордан келиб чиқадиган ўзгартириш ва қўшимчаларни киритиш тўғрисида Вазирлар Маҳкамасига таклиф киритади.