Парламент қуйи палатасининг Инновацион ривожланиш, ахборот сиёсати ва ахборот технологиялари масалалари қўмитаси томонидан «Мобил қурилмаларни ягона халқаро идентификация IMEI кодлари бўйича рўйхатдан ўтказиш тизимини такомиллаштириш» масаласини ўрганиш бошланди. Бу ҳақда Қонунчилик палатаси матбуот хизмати хабар бермоқда.
Мазкур ўрганиш Олий Мажлиснинг «Менинг фикрим» ягона жамоатчилик ташаббуслари веб-портали орқали келиб тушган IMEI идентификация кодларини рўйхатдан ўтказиш учун тўловни бекор қилиш ҳақидаги жамоавий мурожаат бўйича қарорини тайёрлаш доирасида ўтказилмоқда.
2019 йил декабрь ойи ўрталарида мобил қурилмаларни IMEI бўйича пулли рўйхатга олишни бекор қилиш тўғрисидаги мурожаат жойлаштирилганди. Петиция эълон қилинган вақтдан буён 20 мингдан зиёд овоз ва 450 дан ортиқ изоҳ тўплади. Парламент уни кўриб чиқиши учун эса 10 минг овоз етарли.
Масалани ўрганиш учун парламентнинг тегишли қўмитаси томонидан депутатлар билан биргаликда IT-бизнеси, илмий ва эксперт доиралари вакилларидан иборат ишчи гуруҳ тузилгани маълум қилинди. Таъкидланганидек, ўрганилаётган масала юзасидан қўмитанинг иши натижаси Олий Мажлис Қонунчилик палатаси ялпи мажлисида кўриб чиқиладиган махсус маъруза бўлиши керак.
Қўмита томонидан мазкур маърузани тайёрлаш доирасида қуйида келтирилган ишларни амалга ошириш режалаштирилмоқда:
мобил қурилмаларни ягона халқаро идентификация IMEI кодлари бўйича рўйхатдан ўтказиш миллий тизими фаолияти билан боғлиқ статистик ва молиявий маълумотларни йиғиш ва таҳлил қилиш;
мобил қурилмалар кодини рўйхатдан ўтказиш учун тушадиган маблағлар ҳажми ва олинган маблағларни аниқлаш ҳамда уларни мақсадли сарфлаш механизмларини ўрганиш;
божхона статистикаси маълумотлари асосида мобил алоқа техникалари импорти динамикаси таҳлили;
импорт қилувчилар ва фуқаролар томонидан IMEI кодларни рўйхатдан ўтказиш амалиётини ўрганиш, ушбу фаолиятда муаммолар эҳтимолини аниқлаш;
мобил қурилмаларни давлат томонидан рўйхатдан ўтказиш тизимини ташкил этиш ва фаолият юритиши халқаро тажрибасининг қиёсий-таққослама таҳлилини ўтказиш;
фойдаланувчилар ўртасида ижтимоий сўровнома ўтказиш;
жорий қилинган мобил қурилмалар кодларини рўйхатдан ўтказиш тизимининг тартиби, мақсад ва вазифаларини аҳолига етказиш бўйича ахборот-тушунтириш ишларининг ўтказилиши самарадорлигини ўрганиш ва бошқалар.
Ўрганилган ишлар асосида қўмита IMEI кодлари бўйича рўйхатдан ўтказиш учун тўловни бекор қилиш/қолдиришнинг мақсадга мувофиқлиги, шунингдек, ушбу соҳада фаолиятни такомиллаштириш бўйича маърузада ўз фикрини баён қилади ва ушбу фикрни Олий Мажлис Қонунчилик палатасига кўриб чиқиш учун тақдим этади.
Изоҳ (0)