Ўзбекистонда нефть қазиб олиш ҳажми кескин камайди. Қазиб олинаётган газ миқдори ҳам камайган

Ўзбекистонда 2020 йилнинг январь ойида автобензин ишлаб чиқариш ҳажми 2019 йилнинг шу даврига нисбатан кўпайди, деб хабар бермоқда Давлат статистика қўмитаси.

Қайд этилишича, 2019 йилнинг январида 71,6 минг тонна бензин ишлаб чиқарилган бўлса, 2020 йилда кўрсаткич 93,6 минг тоннага етган.

Дизель ёқилғисини ишлаб чиқариш ҳажмида ҳам ўсиш кузатилган — 2019 йил январида 81,7 минг тонна, 2020 йилда эса 100,0 минг тонна.

Айни вақтда, Ўзбекистонда нефть қазиб олиш ҳажми кескин қисқарган — 2019 йил январида 60 минг тоннадан ортиқ нефть қазиб олинган бўлса, 2020 йил январида кўрсаткич 19,2 минг тоннани ташкил этган.

Табиий газ қазиб олиш ҳажи ҳам камайган — 2019 йил январида 5,28 миллиард куб метр газ қазиб олинган бўлса, орадан бир йил ўтиб ойлик кўрсаткич 4,75 миллиард куб метрга тушиб қолган.

Шунга қарамай, 2020 йил январида газ конденсати қазиб олиш ҳажми ўтган йилга нисбатан бироз ўсган — бир йил аввал январда 141,4 минг тонна қазиб олинган бўлса, бу йил 143,1 минг тонна қазиб олинган.