Тошкентнинг Миробод туманидаги квартирадан жасади топилган италиялик сайёҳ Гено Жоржонинг ўлими сабабини аниқлаш мақсадида суд-тиббий экспертизаси тайинланди. Бу ҳақда Тошкент шаҳар ИИББ матбуот хизмати хабар бермоқда.

Фото: Star Now

Аввалроқ Ўзбекистон Бош прокуратураси Тошкентнинг Миробод туманидаги ижарага олинган квартирада Италия фуқароси мурдаси топилгани ҳақидаги хабарларни тасдиқлаган эди. Дастлабки хабарларда воқеа жойи кўздан кечирилган вақтда хонадон эшиги бузилмагани, хоналардаги буюмлар тартибли турганлиги, жасадда тан жароҳатлари йўқлиги таъкидланган эди.

Ўзбекистон Ташқи ишлар вазирлиги томонидан тақдим этилган маълумотларга кўра, Гено Жоржо 9 февраль куни Малайзиядан Тошкентга келган. Тошкент шаҳар ИИББ Миграция ва фуқароликни расмийлаштириш хизмати маълумотларига кўра, у 10 февраль куни Италиянинг Ўзбекистондаги элчихонаси вакили орқали Миробод туманидан 30 кунга ижарага олган квартирасига рўйхатдан ўтган.

Сайёҳ 10 февралдан буён алоқага чиқмаганидан хавотирланган қариндошлари ёрдам сўраб Италиянинг Ўзбекистондаги элчихонасига мурожаат қилган. Элчихона вакиллари 16 февраль куни йигит истиқомат қилган квартирага келган, бироқ эшикни ҳеч ким очмаган. Шундан сўнг улар квартира эгаси ҳисобланган аёл Б.Ф.ни чақиришган ва эшик очилиб, ичкарига кирилганида жасад топилган.

Республика суд-тиббий экспертизаси илмий-амалий марказининг Тошкент шаҳар филиали маълумотномасига кўра, Гено Жоржо жасади топилишидан бир неча кун аввал вафот этган. Квартира эгаси Б.Ф.нинг қайд этишича, у 10 февраль куни сайёҳ билан телефон орқали гаплашганида, Гено Жоржо мазаси бўлмаётганини айтган, шундан сўнг улар бошқа гаплашмаган. Унинг ўлими сабабларини аниқлаш мақсадида суд-тиббий экспертизаси тайинланган.

Қўшнилар Б.Ф.нинг квартирасига ким жойлашганидан бехабар бўлган, чунки улар ҳеч қандай шубҳали шовқинни эшитмаган, квартирага кимдир кириб-чиққанини ҳам кўрмаган. «Италия фуқаросининг ўлими бўйича суриштирув ишлари давом этмоқда», — дейилади Тошкент шаҳар ИИББ ахборотида.