Самарқанднинг Маҳмуд Кошғарий кўчасида 35-мактаб олдида ҳомиладор аёл ва беш ёшли ўғлини симёғоч босиб қолди, дея хабар бермоқда Repost.
Ҳодиса гувоҳларидан бирининг таъкидлашича, аввалига қарсиллаган баланд овоз, сўнг боланинг йиғиси эшитилган. Шундан сўнг бир неча киши воқеа жойи яқинидан ўтиб кетаётган тез ёрдам машинасини тўхтатган. «Аммо шифокорлар бошқа чақириққа кетаётганини рўкач қилиб, ёрдам бермаган», — дейилади «Xabar.uz» хабарида.
Қўнғироқ қилиб чақирилган иккинчи тез ёрдам бригадаси 15-20 дақиқа ўтиб етиб келган. Бунгача одамларнинг ўзи симёғочни кўтариб, аёлни чиқариб олган ва жабрланувчиларни касалхонага етказиб борган. «Эътиборли томони, ёрдам бериш учун тўхтаган такси ҳайдовчиси жабрланган аёлнинг турмуш ўртоғи бўлиб чиққан», — дейилади хабарда.
Ҳодиса натижасида аёлда мия чайқалиши кузатилган, бир қатор тан жароҳатлари олган. Боланинг эса оёғи жароҳатлангани айтилмоқда. Таъкидланишича, аҳоли симёғоч авария ҳолатида тургани ҳақида бир неча бор шикоят қилган, аммо расмийлар ҳеч қандай чора кўрмаган.
Изоҳ (0)