Дада-Али Зуфаров Тошкент шаҳар ҳокими ўринбосари — Маҳалла ва оилани қўллаб-қувватлаш бошқармаси бошлиғи этиб тайинланди. Бу ҳақда Тошкент шаҳар ҳокимлиги хабар берди.
Маълум қилинишича, Дада-Али Зуфаров 1975 йилда Тошкент шаҳрида туғилган. У 2001 йилда Тошкент архитектура қурилиш институтини, 2006 йилда Тошкент давлат юридик институтини тамомлаган. 2001 йилдан шу вақтга қадар ҳуқуқ-тартибот идораларида фаолият олиб борган. Дада-Али Зуфаров 2018 йилдан шу кунгача Олмазор тумани прокурори вазифасида ишлаб келаётган эди.
Дада-Али Зуфаровга ўринбосар этиб Тошкент шаҳар ИИББ бошлиғи ўринбосари — Ҳуқуқбузарликлар профилактикаси бошқармаси бошлиғи полковник Маҳкам Вафоев тайинланди.
Аввалроқ Мусохон Оппоқов вилоят ҳокими ўринбосари — Наманган вилояти Маҳалла ва оилани қўллаб-қувватлаш бошқармаси бошлиғи этиб тайинлангани ҳақида хабар берилган эди. Шунингдек, Хоразм, Фарғона, Тошкент вилоятларида мазкур лавозимларга тайинловлар амалга оширилди.
Маҳалла ва оилани қўллаб-қувватлаш вазирлиги Ўзбекистон Президенти таклифига асосан, 18 февралдаги қарор билан ташкил этилди. Аввалроқ мазкур вазирлик раҳбари Раҳмат Маматовнинг номзоди Олий Мажлис Қонунчилик палатаси томонидан маъқулланган эди. Янги вазирлик раҳбарига биринчи ўринбосар этиб тугатилган Хотин-қизлар қўмитасининг собиқ раҳбари Элмира Боситхонова тайинланди. Шунингдек, ички ишлар вазири ўринбосари Азиз Икромов, Давлат солиқ қўмитасининг собиқ раиси Ботир Парпиев, «Нуроний» жамғармаси раҳбари Содиқжон Турдиев вазир ўринбосарлари этиб тайинланди.
Изоҳ (0)