Ўзбекистон Либерал-демократик партияси раиси, Олий Мажлис Қонунчилик палатаси спикери ўринбосари Актам Ҳайитов ижтимоий тармоқларда кенг муҳокамаларга сабаб бўлаётган «Миллий тикланиш» партияси етакчиси, Олий Мажлис Қонунчилик палатаси спикери ўринбосари Алишер Қодировнинг фикрига муносабат билдирди.
Сурхондарёнинг Олтинсой туманида 14 февраль куни маҳаллий аҳоли ва ҳокимият вакиллари ўртасида юз берган тўқнашувга муносабат билдираркан, депутат Алишер Қодиров ижтимоий тармоқлардаги саҳифаларида олтинсойлик «бебош фуқароларни кескин жазолаш» лозимлиги ҳақида пост қолдирганди.
Депутатнинг бу фикрлари муҳокамаларга сабаб бўлди, ушбу муҳокамалар жараёнида фойдаланувчиларнинг фикрларига жавоб қайтараркан, депутат бир ўринда: «Сиз мени сайламагансиз, мендан ҳеч нарса кутманг», деган мазмунда жавоб қайтарди (ва кейинроқ бу жавобини ўчириб ташлади).ЎзЛиДеП етакчисининг фикрича, Олтинсойдаги воқеаларда фақат «фуқароларни ҳам айблаб бўлмайди», бу ерда тизимли камчиликлар бор. Депутат эса, Ҳайитовнинг қайд этишича, «халқ олдида масъуллиги»ни унутмаслиги керак.
«Сурхондарё воқеалари жуда долзарб тус олди, аввало бу ерда фуқароларни ҳам айблаб бўлмайди. Бизда тизимда камчиликлар бор. Алишер Қодировнинг депутат сифатида халқ олдида масъуллиги бор. Биз қонунда ёзилган нормани оёғости қилишга ҳаққимиз йўқ», — деди Актам Ҳайитов.
Айни вақтда, ЎзЛиДеП етакчисининг таъкидлашича, фуқаро сифатида ҳар кимнинг ўз шахсий нуқтаи назари бор ва, шу жиҳатдан, Алишер Қодиров ҳам «фуқаро сифатида ўз фикрини айтган бўлиши мумкин», Аммо депутат сифатида бундай фикр билдириш, унинг фикрича, нотўғри.
«Унга битта одам овоз берганми ё иккита, фарқи йўқ — ҳурмат қилиш керак. Сурхондарёликлар Алишер Қодировни сайламаган бўлса ҳам, партиясидан кимнидир сайлаган бўлиши мумкин. Ҳар бир сайловчи депутатдан ҳар бир саволига жавоб олишга ҳақли. Унга сиз мени сайламагансиз дейиш тўғри деб ўйламайман», — деди у.
Изоҳ (0)