«Менинг фикрим» порталига Ўзбекистонда учувчисиз учадиган қурилмалардан фойдаланишга қўйилган тақиқни қайта кўриб чиқишни таклиф қилувчи петиция жойланди.
Мурожаатда айтилишича, бошқа мамлакатларда дронлардан фойдаланиш бўйича бундай қатъий тақиқлар мавжуд эмас. Мазкур қурилмалар нафақат туризмда, балки бошқа соҳаларда ҳам кенг имкониятлар очади.
Петиция тўрт кун ичида 2500 дан ортиқ овоз тўплаган. Агар мурожаат белгиланган муддат ичида 10 мингта овоз тўпласа, парламент уни кўриб чиқиши керак бўлади.
Ўзбекистонда 2015 йилдан буён учувчисиз учадиган қурилмаларни олиб кириш, сотиш ва фойдаланиш тақиқланган. Бу тақиқдан бир нечта ҳолат мустасно. Хусусан, «Геоинновацион марказ» ДУК, хорижий ижодий гуруҳлар. Шу билан бирга, вазни 250 граммдан ортиқ бўлмаган ҳамда фото ва видеокамера билан жиҳозланмаган учувчисиз учадиган қурилмаларни мамлакатга олиб кириш ва улардан фойдаланиш мумкин.
Агар дронлар қонуний тартибда мамлакатга олиб кирилса, улардан фойдаланиш учун махсус рухсатнома олиш керак бўлади.
Президент Шавкат Мирзиёев 2019 йилнинг 2 май куни дронлардан ноқонуний фойдаланганларни озодликдан маҳрум этишни кўзда тутувчи қонунни имзолагани ҳақида хабар берилган эди.
Қонунга кўра, Жиноят кодексига учувчисиз учадиган аппаратларни қонунга хилоф равишда олиб кириш, ўтказиш, олиш, сақлаш ёки улардан фойдаланиш учун уч йилгача озодликдан маҳрум қилиш жазоси киритилган.
Мазкур ҳаракатлар такроран ёки ўта хавфли рецидивист томонидан, ўз хизмат ваколатидан фойдаланган ҳолда ёки бир гуруҳ кишилар томонидан олдиндан келишилган ҳолда содир этилганда, ўрта ёки оғир даражадаги тан жароҳати етказишга сабаб бўлганда — уч йилдан беш йилгача озодликдан маҳрум қилишга сабаб бўлади.
Мазкур ҳаракатлар одам ўлимига, ҳалокатга ёки бошқа оғир оқибатларга сабаб бўлса, саккиз йилдан ўн йилгача озодликдан маҳрум қилиш жазоси қўлланилади.
Янги қоидаларнинг кучга кириши муносабати билан Давлат божхона қўмитаси фуқароларни белгиланган талабларга тўлиқ риоя қилишга чақирди.
Қўмита томонидан хабар берилишича, учувчисиз учиш қурилмаларини, уларнинг қўшимча ва эҳтиёт қисмларини ўз ихтиёри билан топширган шахслар жиноий жавобгарликдан озод қилинади.
Изоҳ (0)