Бир муддат аввал ижтимоий тармоқларда Шаҳрисабз тумани ҳокимлиги вакили фуқарога қўполлик қилаётгани акс этган видеоёзув тарқалган эди. Ушбу ҳолат юзасидан Шаҳрисабз тумани ҳокимлиги ахборот хизмати раҳбари Сарвар Примов баёнот берди. Баёнотда таъкидланишича, видеода акс этган воқеа 2020 йил февралида эмас, балки 2018 йил ноябрь ойида юз берган.
Видеолавҳада берилган изоҳда ҳокимликка адолат сўраб келган фуқаро Шуҳрат Абдуллаевни фермер деб нотўғри изоҳ беряпти. Аслида, фуқаро Шуҳрат Абдуллаев фермерлик фаолияти билан шуғулланмаган ва Шаҳрисабз туман Давлат хизматлари марказида фермер сифатида ҳисобда турмайди. У амалдаги қонунларимизга хилоф равишда Шаҳрисабз «Пилла» АЖга қарашли Шаҳрисабз тумани Авазмалик қишлоғидаги тут плантациясида ноқонуний уй-жой қурилишини амалга оширган.Видеоёзувдаги ҳолат ва туман ҳокимлиги баёноти юзасидан «Дарё» мухбири билан суҳбатлашган фуқаро Шуҳрат Абдуллаевнинг таъкидлашича, видеода акс этган зиддият 2018 йил 6 декабрь куни юз берган. У қаровсиз ётган чиқиндихонани тозалаб, ўзбошимчалик билан уй қуриб олганини ҳам тасдиқлади.Шаҳрисабз туман архитектура ва қурилиш бошқармаси мутасадди бўлимлар билан ҳамкорликда фуқаро Шуҳрат Абдуллаевнинг юқоридаги ноқонуний ҳаракатини ўрганиб чиқиб, Шаҳрисабз тумани ҳокимлигига 2018 йил 24 ноябрь куни тақдимнома киритган, фуқаро Шуҳрат Абдуллаевга ушбу ноқонуний қурилишни ўз кучи билан бузиб олиш ҳақида 2018 йил 25 ноябрь куни огоҳлантириш хати берган.
Юқоридаги огоҳлантиришдан қаноатланмаган ҳамда ноқонуний қурилишни бузишдан бўйин товлаган фуқаро Шуҳрат Абдуллаев 2018 йил ноябрь ойининг охирида Шаҳрисабз туман ҳокимлигига келиб, жанжал кўтарган ҳамда туман ҳокимлиги юристини ҳар хил сўзлар билан ҳақоратлаб, тортишиб қолган.
Сарвар Примов, Шаҳрисабз тумани ҳокимлиги ахборот хизмати
«Оилада саккиз ўғилмиз, шарт-шароитимиз жуда оғир эди. Шу боис чиқиндихона бўлса-да, тозалаб, икки хонали уй қургандим. Ҳокимликка ёрдам сўраб боргандим — Президент томонидан эълон қилинган акция доирасида уйимни ҳужжатлаштириб олмоқчи эдим. Аммо ҳокимлик юристи менга қўпол муомалада бўлиб, ‘бир ойда уйни ташлаб, чиқиб кет’ деди», — дейди у.
У юристнинг олдидан чиқиб кетаётганида, тегишли ташкилотларга мурожаат қилишини айтган. Шундан сўнг видеодаги жанжал бошланган. «Юрист: ‘Борган жойингга бор’, деди. Мен эса у ҳамманинг ишини битириб бераётганини, демак, қандайдир манфаати борлигини айтиб эшикдан чиқаётганимда, ортимдан келиб, ‘мени сўкдинғ дея ура бошлади», — деди фуқаро.
Шундан сўнг у ҳам юристга сўкиниб, қаршилик кўрсатган. Ушбу жараён фуқаронинг укаси Тоир Абдуллаев томонидан видеога олинган — бу иши учун ҳокимлик вакиллари уни кўпчилик бўлиб қувлаган. «Кўпчилик бўлиб қувлашди. Юрист ҳокимлик қоровулларига укамни ушлашни буюрди. Ҳамма укамни қувди», — дея қўшимча қилди фуқаро.
Шаҳрисабз туман ҳокимлиги ахборот хизмати раҳбари Сарвар Примовнинг «Дарё» мухбирига маълум қилишича, мазкур воқеа аллақачон судда кўриб чиқилган ва айбдорларга тегишли тартибда жазо тайинланган. Бироқ ҳокимлик вакили суд қарорини тақдим этмади. Фуқаро Шуҳрат Абдуллаевнинг қўшимча қилишича, унга суд чақирув хати суд ўтиб бўлганидан сўнг келган.
«Судни ҳам шу юристнинг ўзи ёпган. Чунки менга чақирув қоғози суд ўтгач келди. Суд қандай қарор чиқарганидан хабарим йўқ», — деди Шуҳрат Абдуллаев. Фуқаро ҳамон ўша — собиқ чиқиндихона ўрнида қурган икки хонали уйида яшаяпти, уни ҳужжатлаштириш ишлари эса ҳали ҳам битмаган. Туман ҳокимлиги юристи Фарҳод Ғаниев ҳам ўз ишида давом этмоқда.
Изоҳ (0)