Андижоннинг Избоскан туманида 11 февраль куни соат 9:57 атрофида «Куйганёр» ва «Пойтуғ» станциялари оралиғидаги темирйўлда 2003 йилда туғилган, 9-мактабнинг 10-синф ўқувчиси Нуржаҳон Турғуновани поезд уриб кетгани ҳақида хабар берилган эди. Фарғона транспорт прокуратураси ахборотига кўра, қиз дугонаси билан темирйўл бўйлаб суҳбатлашиб келаётган бўлган ҳамда тепловознинг огоҳлантириш сигналига эътибор бермаган; таъкидланишича, тепловоз кескин тормоз бериб тўхтаётган вақтида ўсмир қиз эҳтиётсизлиги сабаб тепловознинг чап нарвонига урилиб кетган.
«Жабрланувчи шифохонага олиб борилганида унга бош мия чайқалиши ва бош тепа қисмида 2 сантиметр ёриқ бўлган жароҳат аниқланган. Ўсмир қизга зарурий тиббий ёрдам кўрсатилгач, ўша куннинг ўзидаёқ уйига жавоб берилган», — дейилади Фарғона транспорт прокуратурасининг 13 февралдаги ахборотида. Бироқ прокуратуранинг ушбу ахборотини ишонарли деб бўлмайди — «Дарё» мухбири Умиджон Мамарасуловнинг хабар беришича, ўқувчи қиз шифохонага оғир аҳволда олиб келинган, 14 февралда операция қилинган ва ҳали ҳам шифокорлар назорати остида қолмоқда.
Воқеа дарс вақтида юз берган
Нуржаҳон Турғунова биринчи соат дарсидан сўнг 8-синфда ўқийдиган дугонаси Ҳафиза Тиллаева билан мактабдан чиқиб кетган. Қизлар мактабдан берухсат, ҳеч кимни огоҳлантирмай, ўзбошимчалик билан чиқиб кетишганини ўзлари ҳам тасдиқлашмоқда. Нуржаҳоннинг синф раҳбари Нафиса Мирзаматованинг таъкидлашича, ўқувчиси иккинчи ва учинчи соат дарсларида қатнашмаганидан сўнг, уни излашга тушган.
«Биринчи соатда навбатчи йўқламага кирганда у дарсда бўлган. Иккинчи соат дарсида кеч қолганлар ва дарсга келмаганлар ҳақида сўраш учун кирганимда, Нуржаҳоннинг кўчага чиқиб кетганини айтишди. Иккинчи соат дарсим борлиги сабаб дарсга кириб кетдим. Учинчи соатда синфга ўзим дарс ўтишим керак эди — шунда ҳам унинг йўқлиги учун ҳавотирланиб, 15 дақиқача қидириб, тополмаганимдан кейин 27 болага дарс ўтдим», — дейди Мирзаматова.
Тўртинчи соат бошланиши арафасида синф раҳбари аълочи ва фаол ҳисобланган ўқувчисини қидиришга жиддий киришиб, кўчага чиқиб кетаётганида қўл телефони жиринглаб қолган. «Зудлик билан шошилинч тиббий ёрдам бўлимига келишимни сўрашди... Нуржаҳон билан операциядан кейин суҳбатлашганимда, нима бўлганини айтиб, узр сўради. Ўқувчим фарзандимдек, шу боис ҳали ҳам ўзимга келолмаяпман», — дея қўшимча қилди ўқитувчи.
Қизлар дарс вақтида мактабдан қандай қилиб чиқиб кетган?
Қизлар ўқийдиган Избоскан туманидаги 9-мактаб директорининг ўқув ишлари бўйича ўринбосари Шаҳзода Солиеванинг сўзларига кўра, Нуржаҳон ва Ҳафиза мактабдан кўчага бино ортидаги девордан ошиб чиқиб кетган, «шу сабабли ҳам навбатчилар уларни кўрмаган».
«Мактабимизга икки томондаги дарвозадан кирилади. Қизларнинг асосий эшикдан чиқиб кетганини ҳеч ким кўрмаган. Менимча, иккинчи дарвоза ёки бино ортидаги девордан ошиб ўтиб, мактабдан чиқиб кетишган. Акс ҳолда, навбатчилар кўрганида, уларни қайтариб, дарсга киргизиб юборарди», — деди у.
Нуржаҳон ва Ҳафизанинг сўзлари эса мактаб директори ўринбосарининг айтганларини рад этмоқда — улар кўчага асосий дарвозадан чиқиб кетганини, ўша вақтда эшик олдида навбатчи ўқитувчилар бўлмаганини таъкидламоқда.
«Танаффус бўлишига икки-уч дақиқа борлиги сабаб, эшик олдида навбатчи йўқ эди. Бундан унумли фойдаланиб, ҳеч кимга билдирмай чиқиб кетдик», — деди Нуржаҳон. «Ташқарига чиқиш учун битта эшик бор. Одатда ўғил болалар девор ошиб дарсдан қочади. Қизлар учун бу имконсиз — девор ошишга кучимиз ҳам етмайди», — дея қўшимча қилди Ҳафиза.
«Дадамга совға олмоқчи эдим»
Нуржаҳоннинг айтишича, 13 февраль дадасининг туғилган куни бўлган, шу муносабат билан у дадаси ва акаси томонидан «тушлик ва бошқа харажатлар учун берилган пуллардан йиққан маблағи»га совға олмоқчи бўлган. «Ойижонимга маслаҳат солгандим, бозорга боришимга рухсат бермадилар», — дейди у. Буни онаси Иноятхон Қодирова ҳам тасдиқлади. «Уйдан мактабга чиқиб кетаётиб, бозорга бориб дадаси учун совға оламан деганди, рухсат бермагандим. ‘Хўп’, деб чиқиб кетганди», — деди она.Онасига «хўп» деганига қарамай, Нуржаҳон биринчи дарс тугамасидан, ўзининг айтишича, «ўзбошимчалик қилиб», қўшниси Ҳафиза билан бирга бозорга отланган, лекин бозордаги дўконлардан излаган нарсасини тополмай, мактаб томон қайтишни бошлаган. «Релсларга етай деганимда узоқдан поезд сигнал чалиб келаётганини кўрдим. Йўлнинг нариги томонига ўтишга улгурганимни эслайман, кейин нима бўлганини билмайман. Кўзимни очганимда атрофимда шифокорлар юрганини кўрдим. Поездга тегиб кетганимни уларнинг суҳбатидан билдим», — дейди Нуржаҳон.
Ҳафизанинг айтишича, улар узоқдан поезд келаётганини кўриб, тезроқ ўтиб кетишга ҳаракат қилишган. «Мен бир қадам олдинда эдим, Нуржаҳон ҳам ярим-бир қадамча ўтишга улгурганди. Лекин ўша пайт поезд етиб келиб қолди. Ортга қараганимда у вагон нарвонига урилиб, йўлда ағанаб ётганди. Унга ёрдам беришга ҳаракат қилдим, шу вақт тумонат одам тўпланди... Қолганини эслолмайман. Ўзимга келганимда шифохонада эдим», — дейди 8-синфда ўқийдиган Ҳафиза.
Иккала қиз ҳам бир фикрни якдил такрорлади: «Энг катта хатоимиз — устозларимиздан сўрамай чиқиб кетганимиз. Катталарнинг гапига кирмаганимиз учун энди жабрини кўряпмиз. Бундан афсусдамиз».
«Бемор оғир ҳолатда, қўл-оёқларида сезги ва ҳаракат йўқ эди»
Фарғона транспорт прокуратурасининг ахборотида жабрланувчи Нуржаҳон Турғунова шифохонага олиб борилганида унга бош мия чайқалиши ташхиси қўйилгани, бошининг тепа қисмида икки сантиметр ёриқ бўлган жароҳат аниқлангани, қизга зарурий тиббий ёрдам кўрсатилгач, шу куннинг ўзида унга уйига жавоб берилгани таъкидланади. Бироқ «Дарё» мухбирининг ўрганишлари прокуратура баёнотини мутлақо рад этди — қизнинг аҳволи етарлича оғир бўлган, шу боисдан у 14 февраль куни операция ҳам қилинган.
Республика шошилинч тез ёрдам илмий маркази Андижон филиали бош шифокори Азизбек Мамадиевнинг айтишича, бемор Нуржаҳон Турғунова 11 февраль куни поезд уриб кетиши оқибатида шикаст олиб, Избоскан туман шошилинч тиббий ёрдам бўлимининг жонлантириш бўлимига ётқизилган. У шу ернинг ўзида САС тизими орқали нейрохирург томонидан кўрикдан ўтказилиб, реанимобилда Республика шошилинч тиббий ёрдам илмий маркази Андижон филиалининг травматология бўлимига олиб келинган.
Беморнинг ҳолати оғир бўлгани боис у зудлик билан нейрореанимацияга ётқизилган, бош мия ва бўйин соҳаси мултиспирал компьютер томографияси текширувидан ўтказилган. «Олиб келинганида умумий аҳволи оғир, қўл ва оёқларида сезги ва ҳаракатлар йўқ эди. Беморга профессор К.Худойбердиев томонидан ташхис қўйилиб, зудлик билан операция белгиланган. Операция 14 февраль куни ўтказилди», — дейди болалар нейротравматология бўлими врач-нейрохирурги Сойибжон Жабборов.
«Дарё» мухбирининг Нуржаҳонга қараётган шифокорларга асосланиб маълум қилишича, «айни пайтда Нуржаҳоннинг ҳолати РШТЁИМга олиб келинган вақтдагига нисбатан яхши, у шифокорларнинг доимий назоратида». Лекин Фарғона транспорт прокуратураси ахборотида таъкидланганидек, ҳали уйига жавоб берилмаган ва у РШТЁИМда қолмоқда.
Изоҳ (0)