Болалар учун энг яхши ва энг ёмон шароитларга эга давлатлар таққосланди. Улар орасида Ўзбекистон ҳам бор

Болалар ҳаёти учун дунёда энг яхши шароит Норвегия, Жанубий Корея ва Нидерландияда, энг ёмони эса Марказий Африка Республикаси, Чад ва Сомалида экани маълум бўлди. Бу ҳақда UNICEF сайтида жойлаштирилган «Дунё болалари учун келажак» деб номланган маърузада келтирилган.

Унга кўра, болаларнинг келажаги учун энг яхши шароитлар Норвегия, Жанубий Корея, Нидерландияда яратилган. Етакчи ўнталикдан Франция, Ирландия, Дания, Япония, Бельгия, Исландия, Британия ҳам ўрин олган.

Энг ёмон шароитлар эса Сомали, Чад, Марказий Африка Республикасида деб келтирилган.

Бунда экспертлар дуёнинг 180 мамлакатида болалар учун шароитларни таққослаб, уларнинг яшаши ва равнақ топиши учун яратилган шароитлар, жумладан, давлатнинг соғлиқни сақлаш, таълим тизимлари ривожланиши, экологияси, иқтисодиётини таҳлил қилган.

Рейтингда Ўзбекистон 180 та давлат ичида 71-ўринни эгаллаган. Экспертлар Ўзбекистонни паст-ўрта даромадли давлат деб баҳолаган.

Шунингдек, Марказий Осиё давлатларидан Туркманистон 52-ўринни, Қозоғистон 59-ўринни, Қирғизистон 96-ўринни, Тожикистон 98-ўринни эгаллаган.