Фарғона вилояти ички ишлар бошқармаси томонидан 19 февраль куни ташкил этилган матбуот анжуманида Қўқон шаҳридаги «Шедевр» чойхонасидаги жиноий ҳолат бўйича баъзи маълумотлар берилди. «Дарё» мухбирининг хабар беришича, унда вилоят ИИБ бошлиғи, полковник Дониёр Тошхўжаев воқеа тафсилотларини маълум қилди.
Қайд этилишича, жорий йилнинг 5 февраль куни тунги вақтда Қўқон шаҳридаги «Марокаш» чойхонасида бир неча ёшлар ўртасида жанжал юз берган. Шу ҳудудда хизмат олиб бораётган ИИБ ходимлари машинасини кўрган ёшлар жанжални тўхтатишган ва «Шедевр» чойхонасида ўзаро муносабатларга ойдинлик киритишга уринишган. Натижада, ёшлар ўртасидаги жанжал оммавий тус олган. Жанжал вақтида 27 ёшли З.М. тегишли тартибда рўйхатдан ўтмаган қирқма ов милтиғи билан Б.М., А.Қ. ва Ш.Ж.га қарата икки маротаба ўқ узиб, тан жароҳати етказган.
Шифохонага бориб жабрланувчилар билан гаплашдик. Шу ҳолатда ҳам биздан асл вазиятни беркитишга уриниб, оилавий жанжал сабаб уйидаги ойнани синдириб, қўлини жароҳатлаб олганини айтди. Биз аралашмасак, муаммосини ўзи ҳал қилиб оларкан. Ҳамма муаммосини ўзича ҳал қилиб олаверса, қонун қаерда қолади?Чойхонани бориб кўрдик. Ҳамма жой тошбўрон бўлиб ётибди. Ўз кўзингиз билан кўрмасангиз тасаввур қила олмайсиз.
Воқеа жойидаги кузатув камераларидан олинган видеотасвирлар кўп нарсага аниқлик киритди. Жабрланувчининг ўзи қўлига тош билан ‘дубинка’ кўтариб олиб жанжални бошлаганлардан бири экан
Ҳаммасини қўлида ‘дубинка’, ҳаммасини қўлида пичоқ, ҳаммасини қўлида тош. Ҳаммасини ҳаракатларида жиноят аломатлари бор.
Дониёр Тошхўжаев, Фарғона вилояти ички ишлар бошқармаси бошлиғи.
Маълум қилинишича, ҳодиса юзасидан дастлаб 30 нафар шахс қўлга олинган. Вилоят прокуратураси томонидан 1 нафар шахсга нисбатан Жиноят кодексининг 25, 97-моддаси 2-қисмининг тегишли бандлари (Қасддан одам ўлдиришга суиқасд) билан, 2 нафар шахсга нисбатан Жиноят кодексининг 248-моддаси (Қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) билан жиноят иши қўзғатилган. 27 нафар шахсга қамоққа олиш тарзидаги эҳтиёт чораси танланган.
14 февраль куни ўтказилган тезкор тадбирда мазкур ишга алоқадорлиги тахмин қилинган 25 нафар шахс аниқланиб, уларга нисбатан маъмурий қамоқ қўлланилган.
Таъкидланишича, мазкур ҳодиса ортидан вилоят ҳудуди бўйлаб шартли ном остида «Тонг» тадбирлари ўтказилмоқда. 18 февралга қадар фуқаролардан 500 дан ортиқ тиғли ва тан жароҳати етказиши мумкин бўлган жисмлар олинган. 86 нафар шахс билан профилактик суҳбат олиб борилган. 35 нафар шахсга маъмурий қамоқ, 10 нафарига маъмурий жарима қўлланилган.
Эслатиб ўтамиз, Қўқонда чойхонада жанжаллашган эркак бир неча кишини ов милтиғи билан жароҳатлагани ҳақида хабар берилганди. Кейинроқ Фарғона вилояти ИИБ ахборот хизмати ҳодиса юзасидан 30 нафар шахсга нисбатан қамоққа олиш тарзида эҳтиёт чораси қўлланилганини маълум қилганди.
Изоҳ (0)