2019 йилнинг июль ойида Адлия вазирлиги «Навоий» эркин иқтисодий зонасига инглиз ҳуқуқини жорий этиш режалаштирилаётганини маълум қилган эди, деб ёзади Spot.
Ўшанда вазирлик вакиллари Британия экспертлари билан ушбу тажрибани ўрганиш мақсадида музокаралар олиб борган эди.
Қайд этилганидек, инглиз ҳуқуқи ЭИЗ иштирокчиларининг ҳаракатларини ҳуқуқий тартибга солиш воситаси бўлиб хизмат қилади, шунингдек, «бутун дунё бизнеси бу тизимга ишонгани боис» у Ўзбекистон тараққиётига ижобий таъсир кўрсатади.
20 февраль куни Халқаро пресс клуб сессиясида иштирок этган адлия вазири ўринбосари Акбар Тошқулов инглиз ҳуқуқини жорий этиш жараёни камида 4—5 йил вақт олишини айтиб ўтган.
«Ҳозир музокаралар, ҳаракат механизмларини ишлаб чиқиш жараёни кетмоқда. Буни тезда амалга ошириш мумкин эмас, чунки махсус арбитражни яратиш, бу соҳада мутахассисларни тайёрлаш каби қўшимча ташкилий масалалар мавжуд», — деди адлия вазирининг ўринбосари.
Инглиз ҳуқуқи асосан инвестиция низоларни ҳал қилиш учун қўлланилади, дейди Тошқулов. Бунинг учун Ўзбекистонда ушбу тизимдан фойдаланадиган институтлар ташкил этилади.
Изоҳ (0)