Xitoydan kelgan o‘zbekistonliklar “Bo‘ston” sanatoriyasidagi 14 kunlik karantin haqida so‘zlab berdi

“Bo‘ston” sanatoriyasida 18-fevral kuni koronavirus karantini yakunlanib, Xitoydan kelgan 294 nafar fuqaro uylariga kuzatilgani xabar berilgan edi. Tahlil natijalarida biror fuqaroda koronavirus infeksiyasi yo‘qligini aniqlangan.

Turli maqsadlarda Xitoyda safarda bo‘lgan jami 584 nafar fuqaro joriy yilning 4—6-fevral kunlari uchta charter reys orqali mamlakatga olib kelingandi. Ularning 459 nafari erkak va 125 nafari xotin-qizlardir.

Bugun, 19-fevral kuni, ushbu davolash muassasasiga joylashtirilgan yana 84 nafar fuqaro karantin muddati yakuniga yetishi munosabati bilan uyiga kuzatildi. Ularning ham birortasida koronavirus infeksiyasi aniqlanmadi.

Kuzatish marosimida ishtirok etgan “Xabar.uz” muxbiri karantin muddatidan chiqqan fuqarolar bilan suhbatda bo‘ldi.

Ikki hafta aytishgagina oson, Xitoyda o‘g‘lim Hojiakbar va kelinim Rushona tahsil oladi. Vahimali gaplar, albatta, odamning halovatini o‘g‘irlaydi. Kecha-yu kunduz tashxislari yaxshi chiqsin, deya niyat qilib o‘tirdik. Mana bugun bolalarimni sog‘-salomat bag‘rimga bosayotganimdan juda baxtiyorman. Ular men uchun qaytadan tug‘ilgan kun bugun.

Nazira G‘ulomova

Albatta, butun dunyo bu epidemiya haqida to‘xtovsiz bong urayotgan bir paytda farzanding ham o‘sha yerda ekanligi ona sifatida qalbingizni bezovta qiladi. O‘g‘limga, avvalo, shifokor sifatida o‘zini qanday himoyalash kerakligi bo‘yicha tavsiyalar berdim. O‘zbekistonga qaytgach, yana nimalarga e’tibor berish kerakligini tez-tez eslatib, o‘zini qanday his qilayotganini surishtirib turdim. Aytmoqchimanki, hech qanday kasallik besabab tarqalmaydi. Har bir inson, avvalo, bolalikdan tibbiy madaniyatini shakllantirib borishi lozim. Oddiygina gigiyenik qoidalarga rioya qilish — bemor holida jamoat joylarida niqobsiz yurmaslik, qo‘lni sovunlab yuvish aslida odamdan ko‘p mehnat talab qilmaydi. Ozgina qunt va hafsala kerak.

Hilola Rustamova, onkolog shifokor

Xitoyda yashayotgan, bosh olib ketishga boshqa boshpanasi bo‘lmagan xitoyliklarning o‘zlari bu musibatni qanday kutib olishganiga ham to‘xtab o‘tildi.

Bo‘lg‘usi jurnalist sifatida va u yoqdagi vaziyat bilan bu yerdagi vaziyatni taqqoslagan holda shuni aytishim mumkinki, Xitoyda yashayotganlar bizning yurtdoshlarimizdek vahimaga yoki tushkunlikka tushib qolishgani yo‘q. Men yashagan provinsiyadagilar ham kundalik oddiy hayotlarini davom ettirishmoqda. Meni hayron qoldirgani bizda ortiqcha vahima ko‘tarilganligidir. To‘g‘ri, bu epidemiya ba’zi insonlarni hayotdan olib ketayotgani, butun dunyo iqtisodiyotiga zarar yetkazayotgani achinarli, lekin bunday vaziyatda xotirjam bo‘lish, yolg‘on mish-mishlarni tarqatish vaziyatni yanada chigallashtiradi. Mana shu holat orqali yana bir narsani anglab yetdim. Hamma xabarlarga ham ishonaverish va xayp uchun ortiqcha vahima ko‘tarib axborot tarqatish yaxshi emas ekan. Yana bir gap, biz — Xitoyda o‘qiyotgan talabalar bir-birimizga e’tiborsiz edik. Musibat bizni birlashtirdi. Xitoyda o‘qiyotgan talabalar ijtimoiy tarmoqlarda guruh ochib, bir-birimizdan xabarlashib turibmiz, bu yerda ham ko‘pchilik bilan do‘stlashdik.

Otajon Esanbayev, Navoiy viloyati

Shuningdek, shifokor va hamshiralar bunday tahlikali vaziyatda o‘zlarini qanday his qilganini ham so‘zlab berishdi.

Xitoydan talabalarning kelishi uchun mana shu yerda tayyorgarlik ko‘rilayotgan paytdayoq nafaqat shifokorlar, balki biz hamshiralar ham ikki hafta hech qayoqqa chiqmasligimiz haqida ma’lumotga ega edik. Kimning chekiga shu yerda qolish, ular bilan birga bir havodan nafas olish tushgan bo‘lsa, bajonidil rozi bo‘ldik. Ular bilan birinchi kundanoq hech qanday qo‘rquvlarsiz muloqotga kirishdik. Bir kunda ikki martalab tekshirdik. Albatta, bizni mas’ul idoralar, avvalo, Sog‘liqni saqlash vazirligi barcha himoya vositalari bilan ta’minladi. Bugun ularga javob berilganidan, ota-onalar qarindoshlari dilidagi xavotir barham topganidan xursandmiz. Ular bizga o‘z farzandlarimizdek aziz bo‘lib qolishdi. Yurtdoshlarimga aytmoqchi bo‘lganim vahimaga o‘rin yo‘q. Ammo xotirjam bo‘lishga ham haqqimiz yo‘q. Ya’ni har bir inson sog‘lom turmush tarziga rioya qilishi shart.

Zohida Rahimova, hamshira