Angry Birds ўйини яратувчиси Ўзбекистонда тренинг ўтказади

Финляндиянинг Rovio компанияси маркетинг бўйича директори, Angry Birds оммавий ўйини яратувчиларидан бири Питер Вестербек 2020 йил 26 февраль куни Тошкентда тренинг ўтказади. Бу ҳақда «It-park.uz» хабар берди.

Тренингнинг мақсади маҳаллий мутахассислар малакасини ошириш учун Европадаги IT-саноат ишлаш методларини уларга тушунтириш, шунингдек, савол ва жавоблар сессиясини ташкил қилишдан иборат.

Тадбирда иштиокчилар энг таниқли видеўйинлардан бирига айланган Angry Birds яратувчиларидан бўлган дастурчи билан суҳбат қуриши мумкин. Angry Birds тарихи 2009 йилда бошланган ва 2016 йилгача давом этди. Шунингдек, 2016 йилда ушбу ўйин воқеаларига асосланган мултипликацион фильм намойиш қилинган, 2019 йилда миллионлаб мухлислар меҳрини қозонган Angry Birds’нинг навбатдаги фильми прокатга чиқди. Питер Вестербек ушбу жараёнларда бевосита иштирок этган.

Вестербек Rovio’га келгунига қадар ҳам IT соҳасида узоқ вақт ишлаган, у ҲП Mobile E-Services Bazaar асосчиси, шунингдек, MobileMonday, Edunation, Fun Academy, Lightneer, HP Bazaar, FinEst Bay Area ва Slush каби лойиҳаларнинг таъсисчиларидан ҳисобланади.Вестербек 2011 йилда Time журнали талқинига кўра, «Дунёнинг энг обрўли 100 одами» рўйхатига кирган. 2015 йилга келиб у ушбу рўйхатда кучли ўнликда қайд қилинди. Соҳа билимдони ва кучли нотиқ бўлган Вестербек 2018 йилда Шанхайдаги Тунсзи инновациялар ва тадбиркорлик университетининг профессори илмий мақомига эришган.