Ноқонуний нусхадаги китобларнинг Telegram’да тарқалиши Россияга йилига 55 млрд рубл зарар келтирмоқда

Китобларнинг Telegram каналларидаги ноқонуний нусхалари туфайли Россияда китоблар бозори йилига 55 миллиард рублдан кўпроқ моддий зарар кўрмоқда, дейди интернет ҳуқуқларни ҳимоя қилиш уюшмаси (ИҲҲҚУ) бош директори Максим Рябико «Ведомости»га берган интервьюсида.

Унинг сўзларига кўра, 200 га яқин Telegram каналлари орқали китобларнинг ноқонуний нусхалари тарқатилмоқда ва уларнинг умумий аудиторияси 2 миллион кишини ташкил этади. Рябиконинг таъкидлашича, ушбу мессенжер ҳозирда ‘ru.net’да қароқчиликнинг энг катта манбаларидан бири ҳисобланади.

Муаллифлар Telegram’даги қароқчиликка қарши блокировка билан кураша олмайди, чунки 2018 йил апрель ойидан бошлаб суд қарори билан ушбу мессенжерга кириш расман блокировка қилинган. Уюшма раҳбарининг сўзларига кўра, Telegram мессенжери ИҲҲҚУ шикоятларига жавоб бермаяпти ва ноширлар қароқчиликка чекловларни фақат смартфонлар учун операцион тизимларга эга бўлган Apple ва Google’га мурожаат қилиш орқали эришиши мумкин.

ИҲҲҚУ Telegram мессенжеридан контент нусхаларини қидириб топиш учун «рақамли бармоқ изи»ни киритишни ёки канал эгаларига қонуний даъволарни тақдим этиш учун аниқ маълумотларни киритиш мажбуриятини таклиф қилишни режалаштирмоқда.

Фильм, кўрсатув ва сериал ишлаб чиқарувчилар ҳам Telegram’дан шикоят қилмоқда, деб хабар берган «Ведомости».

Море.тв видео хизмати директори Денис Горшковнинг сўзларига кўра, мессенжер шикоятларга қисқа вақт ичида жавоб берган, аммо у сўнгги мурожаатларга жавоб бермаган.

Интернет видео ассоциациясининг бош директори Алексей Бирдиннинг сўзларига кўра, агар мессенжер сўровларга бу тарзда жавоб берса ва унинг реакцияси бир неча ҳафта давом этадиган бўлса, бу спорт кўрсатувлари ва премьералар учун катта зарар келтиради.

Telegram асосчиси Павел Дуров «Ведомости» сўровига жавоб бермади. Олдинроқ эса Telegram’нинг The Оutline вакили ушбу хизмат доимий равишда контентни модерация қилиш воситаларини такомиллаштириб боришини айтди.

Эслатиб ўтамиз, 2018 йил апрель ойида Telegram ФХБга шифрлаш калитларини беришдан бош тортганлиги сабабли Роскомнадзор суд қарори билан Telegram’ни блоклашни бошлади.

Аввалроқ Telegram асосчиси Павел Дуров WhatsApp мессенжерининг заифликлари ортида хориждаги бир нечта давлатларнинг ҳукуматлари манфаатлари турганини билдирганди.