НАТО давлатлари мудофаа вазирлари Ироқдаги миссияни кучайтириш ҳақида келишиб олди. Бу ҳақда альянс бош котиби Йенс Столтенберг маълум қилди, дея хабар берди «РБК».
«НАТО халқаро терроризм билан курашни фаоллаштирмоқда. Альянсга аъзо давлатлар мудофаа вазирлари маҳаллий ҳукумат билан яқин ҳамкорликда НАТОнинг ўқув миссиясини кучайтиришга келишиб олди», — дея таъкидлаган Столтенберг.
НАТО Ироқдан контингентининг бир қисмини январь ойи бошида олиб чиққан эди. Бу АҚШ авиазарбаси оқибатида Бағдодда эронлик генерал Қосим Сулаймоний ҳалок бўлганидан сўнг амалга оширилган.
Аввалроқ НАТО бош котиби айни пайтда нима қилиш мумкинлиги ўрганиб чиқилаётгани ва жанговар миссияларни кучайтириш режалаштирилмагани ҳақда гапирганди. Шунингдек НАТО хавфсизлик мақсадларида Ироқдан ўз ходимларининг бир қисми чиқарилиши ҳақида маълум қилган.
Эроннинг энг нуфузли генерали Қосим Сулаймоний 3 январь куни Трампнинг буйруғига кўра ўлдирилган. АҚШ президенти Сулаймонийни террорчи деб атаган, Эрон генералнинг ўлими учун ўч олишга ваъда берган. 8 январга ўтар кечаси Эрон АҚШнинг Ироқдаги ҳарбий базаларига ракета зарбалари берган. Шунингдек, Эрон ядро келишувидан тўлиқ чиққанини маълум қилган ҳамда АҚШ армияси ва Пентагонни террорчилик ташкилотлари деб эълон қилган.
Изоҳ (0)