NATO davlatlari mudofaa vazirlari Iroqdagi missiyani kuchaytirish haqida kelishib oldi. Bu haqda alyans bosh kotibi Yens Stoltenberg ma’lum qildi, deya xabar berdi “RBK”.
“NATO xalqaro terrorizm bilan kurashni faollashtirmoqda. Alyansga a’zo davlatlar mudofaa vazirlari mahalliy hukumat bilan yaqin hamkorlikda NATOning o‘quv missiyasini kuchaytirishga kelishib oldi”, — deya ta’kidlagan Stoltenberg.
NATO Iroqdan kontingentining bir qismini yanvar oyi boshida olib chiqqan edi. Bu AQSh aviazarbasi oqibatida Bag‘dodda eronlik general Qosim Sulaymoniy halok bo‘lganidan so‘ng amalga oshirilgan.
Avvalroq NATO bosh kotibi ayni paytda nima qilish mumkinligi o‘rganib chiqilayotgani va jangovar missiyalarni kuchaytirish rejalashtirilmagani haqda gapirgandi. Shuningdek NATO xavfsizlik maqsadlarida Iroqdan o‘z xodimlarining bir qismi chiqarilishi haqida ma’lum qilgan.
Eronning eng nufuzli generali Qosim Sulaymoniy 3-yanvar kuni Trampning buyrug‘iga ko‘ra o‘ldirilgan. AQSh prezidenti Sulaymoniyni terrorchi deb atagan, Eron generalning o‘limi uchun o‘ch olishga va’da bergan. 8-yanvarga o‘tar kechasi Eron AQShning Iroqdagi harbiy bazalariga raketa zarbalari bergan. Shuningdek, Eron yadro kelishuvidan to‘liq chiqqanini ma’lum qilgan hamda AQSh armiyasi va Pentagonni terrorchilik tashkilotlari deb e’lon qilgan.
Izoh (0)