Ўзбекистон Президенти Шавкат Мирзиёев раислигида маҳалла тизимини такомиллаштириш юзасидан ўтказилган йиғилишда 22 март санасини «Маҳалла тизими ходимлари куни» этиб белгилаш таклиф қилинди. Бу ҳақда Президент матбуот хизмати хабар берди.
Маълум қилинишича, Президент маҳаллалар миллий менталитет кўзгуси эканини, жамият ҳаётида катта ўрин тутишини таъкилаб, Наврўз байрамига ҳамоҳанг тарзда 22 март санасини «Маҳалла тизими ходимлари куни» деб эълон қилишни таклиф этди.
Шунингдек, Маҳаллаларда аҳиллик ва ўзаро меҳр-оқибат муҳитини мустаҳкамлаш, ёш авлодда ватанпарварлик, меҳнатсеварлик туйғуларини кучайтиришда кексалар тажрибасидан фойдаланиш муҳимлиги таъкидланди.Маҳалла ва оила масалалари бўйича олиб борилаётган тадқиқотлар кўламини кенгайтириш ҳамда амалиётга жорий этиш мақсадида «Оила» ва «Маҳалла зиёси» марказлари негизида «Маҳалла ва оила» илмий-тадқиқот институтини ташкил этиш бўйича кўрсатмалар берилди.
Йиғилишда давлат-хусусий шериклик шартлари асосида фуқаролар йиғинлари комплексларини қуриш, бўш турган биноларга маҳалла идораларини жойлаштириш масалаларига ҳам тўхталиб ўтилди.
Изоҳ (0)