Ўзбекистон Президенти Шавкат Мирзиёев 12 февраль, чоршанба куни, Россия президенти Владимир Путин билан телефон орқали мулоқот қилди. Бу ҳақда Президент матбуот хизмати хабар берди.
Таъкидланишича, суҳбатда давлатлар раҳбарлари кўп қиррали Ўзбекистон—Россия ҳамкорлиги жадал ривожланиб бораётгани ҳамда стратегик шериклик ва иттифоқчилик муносабатлари изчил мустаҳкамланаётганини катта мамнуният билан қайд этди.
2019 йилда ўзаро ҳамкорликда салмоқли амалий натижаларга эришилгани ва барча даражалардаги мулоқотлар сезиларли фаоллашгани алоҳида қайд этилди.
Хусусан, икки томонлама товар айирбошлаш ҳажми юқори суръатлар билан барқарор ошиб бормоқда. Бир йилнинг ўзида 500 та қўшма корхона ташкил этилди, Россиянинг етакчи компания ва бакнлари иштирокида иқтисодиётнинг муҳим тармоқларида устувор инвестиция лойиҳалари амалга оширилмоқда. Таълим ва маданий-гуманитар соҳалардаги алмашинувлар кенгаймоқда, дейилади хабарда.
Мулоқот чоғида олий даражадаги тадбирлар режаси муҳокама қилинди. Ўзбекистон Президентининг Россияга давлат ташрифи кун тартибини тайёрлаш, жумладан, ташриф доирасида навбатдаги ҳудудлар ва ректорлар анжуманларини, медиа-форум ва бошқа тадбирларни ўтказишга алоҳида эътибор қаратилди.
Ўзбекистоннинг Мустақил Давлатлар Ҳамдўстлигига раислиги йилида Ўзбекистон ва Россия ҳамкорлигининг истиқболлари кўриб чиқилди.
Халқаро ва минтақавий аҳамиятга молик долзарб масалалар юзасидан ҳам фикр алмашилди.
Аввалроқ Шавкат Мирзиёевнинг февраль ойида Россияга ташриф буюриши ҳақида хабар берилган, бироқ мазкур масала юзасидан Россия президенти матбуот котиби Дмитрий Песков баёнот билан чиқиб, Мирзиёевнинг Москвага ташрифи режада бўлмаганини маълум қилди.
Изоҳ (0)