Наманганда халқаро фан олимпиадалари ғолиблари автомобиль билан тақдирланади. Бу вилоят ҳокими Хайрулло Бозоров томонидан қабул қилинган фармойишда белгилаб қўйилди, дея хабар беради «Дарё» мухбири Азизбек Абдувалиев.
Фармойишга биноан, вилоятда халқаро олимпиадаларда муносиб иштирок этишлари учун иқтидорли ўқувчиларни танлаб олиш, уларни етакчи мутахассислар томонидан тайёрланишини йўлга қўйиш чоралари кўрилади.
Тан олинган халқаро олимпиадаларда биринчи ўринни қўлга киритган ўқувчиларга Nexia-3, иккинчи ўрин эгаларига Spark, учинчи ўрин соҳибларига Damas автомобили тақдим этилади.
Наманган вилоят халқ таълими бошқармаси ахборот хизматининг изоҳ беришича, Президентнинг 2019 йил 3 майдаги «Иқтидорли ёшларни аниқлаш ва юқори малакали кадрлар тайёрлашнинг узлуксиз тизимини ташкил этиш чора-тадбирлари тўғрисида»ги қарорига мувофиқ, тан олинган танловлар қаторига халқаро математика, физика, кимё, биология ва информатика олимпиадалари киритилган.
Уларнинг ғолиблари тегишли равишда базавий ҳисоблаш миқдорининг 500, 300 ва 200 баравари миқдоридаги бир марталик пул мукофотларига эга бўлади.
Эслатиб ўтамиз, жорий йил 6 январь куни Норин туманида вилоят ёшлари вакиллари билан учрашган Хайрулло Бозоров халқаро тан олинган олимпиадалар ғолиблари муносиб тақдирланишини ваъда қилганди.
Изоҳ (0)