Namanganda xalqaro fan olimpiadalari g‘oliblari avtomobil bilan taqdirlanadi. Bu viloyat hokimi Xayrullo Bozorov tomonidan qabul qilingan farmoyishda belgilab qo‘yildi, deya xabar beradi “Daryo” muxbiri Azizbek Abduvaliyev.
Farmoyishga binoan, viloyatda xalqaro olimpiadalarda munosib ishtirok etishlari uchun iqtidorli o‘quvchilarni tanlab olish, ularni yetakchi mutaxassislar tomonidan tayyorlanishini yo‘lga qo‘yish choralari ko‘riladi.
Tan olingan xalqaro olimpiadalarda birinchi o‘rinni qo‘lga kiritgan o‘quvchilarga Nexia-3, ikkinchi o‘rin egalariga Spark, uchinchi o‘rin sohiblariga Damas avtomobili taqdim etiladi.
Namangan viloyat xalq ta’limi boshqarmasi axborot xizmatining izoh berishicha, Prezidentning 2019-yil 3-maydagi “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari to‘g‘risida”gi qaroriga muvofiq, tan olingan tanlovlar qatoriga xalqaro matematika, fizika, kimyo, biologiya va informatika olimpiadalari kiritilgan.
Ularning g‘oliblari tegishli ravishda bazaviy hisoblash miqdorining 500, 300 va 200 baravari miqdoridagi bir martalik pul mukofotlariga ega bo‘ladi.
Eslatib o‘tamiz, joriy yil 6-yanvar kuni Norin tumanida viloyat yoshlari vakillari bilan uchrashgan Xayrullo Bozorov xalqaro tan olingan olimpiadalar g‘oliblari munosib taqdirlanishini va’da qilgandi.
Izoh (0)