АҚШ Давлат департаменти матбуот котиби Морган Ортагус «Америка Овози»га берган интервьюсида АҚШ президенти Дональд Трампнинг Марказий Осиёга, хусусан, Ўзбекистонга ташриф буюриши масаласига ойдинлик киритди.
Морган Ортагус мазкур саволга жавоб бериб, бу масалани давлат котиби Майкл Помпео ва президент Дональд Трампга албатта эслатиб, айтиб қўйишини маълум қилган. Унинг сўзларига кўра, Дональд Трамп жорий йилда кўпроқ мамлакатнинг ўзида бўлади, чунки жорий йилда президентлик сайлови бўлиб ўтади. «Ўзбекистон, нақадар меҳмондўст юрт эканини биламиз. Биз учун у ерга бориш шараф», — деб таъкидлаган Ортагус хоним.
Шу билан бирга, Морган Ортагус яқинда АҚШ давлат котиби Майкл Помпеонинг Қозоғистон ва Ўзбекистонга амалга оширилган ташрифи Вашингтон учун қандай аҳамиятга эга экани ҳақида гапирган.
Давлат департаменти матбуот котибининг айтишича, ташриф жиддий сабаблар билан амалга оширилган. Улардан бири Ўзбекистон Президенти бошлаган ислоҳотларни муҳокама қилиш бўлган. «Биз бу жараёнларни қўллаб-қувватлаймиз. Америка бизнеслари ва сармояси учун шароит яхшиланиб, имкониятлар очилишини хоҳлаймиз», — деган Морган Ортагус. Унинг сўзларига кўра, иккинчиси масала диний эркинлик тарғиботи бўлган.
Морган Ортагуснинг таъкидлашича, Ўзбекистон терроризмга қарши курашда АҚШнинг ҳамкори ҳисобланади. Америка матбуоти Афғонистондаги урушни ёритиш билангина чекланади, лекин АҚШнинг минтақадаги миссиясизда Ўзбекистон ёрдам бериб келмоқда. Марказий ва Жанубий Осиёдаги мақсадлар амалга ошишида Ўзбекистоннинг роли муҳим ҳисобланади. Афғонистонда тинчликка эришишда, бу замин тараққий этишида, сиёсий-иқтисодий ва маданий ҳамкорликда ҳам Ўзбекистон ва Қозоғистон ҳамда Марказий Осиёнинг қолган давлатлари беҳисоб ҳисса қўшади.
Морган Ортагус АҚШнинг Марказий Осиё бўйича янги стратегияси масаласида ҳам фикр билдирди.
Унинг қайд этишича, АҚШ барқарор демократия бўлиб, ҳар икки йилда, ҳар тўрт йилда сайлов бўлади. Лавозимлардаги одамлар ўзгариб туради. Бироқ Марказий Осиёга нисбатан сиёсат партия танламайди. Қадриятлар ҳам партия танламайди. Стратегия асоси ўзгармайди.
«Давлат котиби беш йилда биринчи марта борди. Бу орада Хитойнинг роли кучайди. Нафақат савдо ва бизнес бобида, балки мусулмонларга, озчиликдаги элатларга босимни оширди. Бу босим Марказий Осиёга ҳам таъсир қилади. Шу боис биз бориб, айтамиз, биз шу ердамиз. Қадриятларимиз, садоқатимиз, меъёр ва тажрибамиз — барчаси Марказий Осиё халқлари хоҳиши билан ҳамоҳанг. Хитой текинга ёки арзонга нима таклиф қилишидан қатъи назар, биз билан тенглаша олмайди», — дея фикр билдирган АҚШ Давлат департаменти матбуот котиби.
Изоҳ (0)