British Airways самолёти тўфон туфайли Нью-Йоркдан Лондонга рекорд даражадаги қисқа вақтда учиб борди

British Airways авиакомпаниясининг йўловчи самолёти Нью-Йорк шаҳридан Лондонга рекорд даражада тез учиб келди, деб хабар беради Meduza.

Қайд этилишича, лайнер товуш тезлигидан паст самолётлар учун янги трансатлантик парвоз тезлиги рекордини ўрнатган.

9 февраль куни Нью-Йоркдан Лондонга учган самолёт манзилга 4 соат-у 56 дақиқада етиб келган.

Ушбу йўналишдаги аввалги рекорд Norwegian авиакомпаниясига тегишли бўлиб, шаҳарлар орасидаги масофа беш соат-у 13 дақиқада босиб ўтилган. Аслида Нью-Йорк—Лондон йўналишида ўртача парвоз вақти олти соат-у 13 дақиқани ташкил этади.

Қайд этилишича, British Airways самолёти тезлиги соатига 1327 километрни ташкил этган. Лайнер «Кияра» бўрони туфайли юзага келган кучли шамол сабаб тезлигини оширишга муваффақ бўлган.

«Учувчиларимиз йўловчиларнинг Лондонга муддатидан илгарироқ қайтиши учун об-ҳаво шароитларидан максимал равишда фойдаланди», — дейилади British Airways баёнотида.

Авиакомпания Нью-Йорк ва Лондон ўртасидаги парвоз тезлиги бўйича мутлақ рекорд 1996 йилда икки шаҳар ўртасидаги масофани 2 соат 53 дақиқада босиб ўтган «Konkord» самолётига тегишли эканини таъкидлади.

«Кияра» 9 февраль куни Ғарбий ва Шимолий Европага ёпирилиб, Буюк Британияда етти йил ичидаги энг хавфли тўфон ҳисобланмоқда. Шунинг учун мамлакатда юзлаб рейслар қолдирилди, поездлар ва паромлар ҳаракати тўхтатилди, шунингдек, бир нечта оммавий тадбирлар бекор қилинди.