Испания ва Буюк Британияда коронавирус билан касалланган икки киши илгари Францияда коронавирус билан касалланган британияликлар гуруҳига алоқадордир, деб хабар бермоқда республика соғлиқни сақлаш вазирлиги.
«РИА Новости»нинг ёзишича, Франция соғлиқни сақлаш вазири Аньес Бузен мамлакатда коронавирус билан зарарланишнинг бешта янги ҳолати: тўрт нафар катта ёшдаги ва бир бола вирус юқтириб олгани ҳақида хабар берган.
Мутахассисларнинг аниқлашича, биринчи бўлиб британиялик зарарланган бўлиб, у Сингапурда қисқа вақт бўлганидан кейин Францияга келиб Ле-Контамин-Монжуа коммунасидаги тоғ-чанғи курортига жойлашган.
Шундан сўнг ушбу коттежда бўлган яна 4 британиялик касалланган. Коронавирус билан касалланган ва шунчаки биринчи зарарланган одам билан бир жойда бўлган жами 11 киши касалхоналарга ётқизилган.
Шунингдек, ушбу кластер билан боғлиқ яна 2 та касалланиш ҳолати — бири Бирлашган қиролликда, иккинчиси Майоркада аниқланган. Улар ҳам Ле-Контамин-Монжуа коммунасидаги аппартаментда бўлган.
Айни пайтда Францияда коронавирус билан зарарланишнинг 11 ҳолати аниқланган.
Хитойда эса янги турдаги коронавирус қурбонлари сони 908 кишига етди. Касалланганлар сони 40 минг кишидан ошди. Мамлакат коронавирус эпидемиясига қарши курашиш учун 10,3 миллиард долларга яқин маблағ сарфлаб юборди.
Лондондаги Гигиена ва тропик касалликлар тадқиқоти мактаби олимларининг фикрича, февраль ойининг иккинчи ярмида вируснинг тарқалиши ўзининг чўққисига чиқади.
Жаҳон соғлиқни сақлаш ташкилоти (ЖССТ) бош директори Тедрос Адан Гебрейесус коронавирусга қарши курашда ниқоблардан оқилона фойдаланишга чақирди. Ташкилот ҳимоя воситаларига талаб 100 баравар, унинг нархи эса 20 баравар ошишини тахмин қилмоқда.
Изоҳ (0)