Қозоғистон президенти Қосим-Жўмарт Тўқаев Жамбил вилояти Қўрдай туманидаги оммавий жанжалдан сўнг бир неча мансабдор шахснинг ишдан бўшатилишини маълум қилди, деб ёзади Sputnik.
Хусусан, Тўқаев Жамбил вилояти ҳокими Асқар Мирзахметовга ижтимоий масалалар бўйича ўринбосари Сулушаш Қурманбековани ҳамда Қўрдай тумани ҳокими Бўлатбек Байтолени иш фаолиятида жиддий камчиликларга йўл қўйгани учун бўшатишни буюрган.
Президент, шунингдек, Қозоғистон ички ишлар вазири Ерлан Турғумбоевга Жамбил вилояти полиция департаменти бошлиғи ва тартибсизликлар юз берган Қўрдай тумани полиция бўлими бошлиғини ишдан бўшатиш ҳақида кўрсатма берган.
Эслатиб ўтамиз, Қозоғистоннинг Жамбил вилояти Қўрдай тумани Масанчи қишлоғида маҳаллий аҳоли ўртасида келиб чиққан можаро оқибатида 8 киши ҳалок бўлди, 40 дан ортиқ фуқаро жароҳатланди. Жамбил вилояти ҳокими ушбу тартибсизликларда мингдан ортиқ киши иштирок этганини маълум қилган эди.
Изоҳ (0)