Жаҳон соғлиқни сақлаш ташкилоти коронавируснинг Хитойдан бошқа давлатларда ҳам тарқалиши мумкинлигини прогноз қилди

Янги 2019-nCoV коронавирусининг тарқалиши билан боғлиқ вазият мутахассислар ҳозирги кунда тахмин қилаётганидан жиддийроқ бўлиши мумкин. Бу ҳақда Жаҳон соғлиқни сақлаш ташкилоти (ЖССТ) бош директори Тедрос Аданом Гебрейесус Twitter’даги саҳифасида маълум қилди, деб хабар берди «РБК».

ЖССТ раҳбарининг таъкидлашича, Хитойда бўлмаган кишилар томонидан вируснинг янги турини юқтириш ҳолатлари қайд этилган. Унинг фикрича, бу ҳолатлар юқумли касаллик бошқа мамлакатларда ҳам кенг тарқалиши мумкинлигидан далолат беради.

«Қисқача айтганда, биз айсбергнинг учини кўриб турибмиз», — дейди Гебрейесус.

Хитойдан ташқарида вируснинг тарқалиш суръати ҳозирча паст даражада, аммо, кейинчалик у тезлашиши мумкин, дея огоҳлантирди ЖССТ раҳбари. Гебрейесус барча давлатларни инфекциянинг кириб боришига тайёргарлик кўриш учун ‘имкониятлар дарчасидан’ фойдаланишга чақирди. «Бу касалликни лабораторияда тезда ташхислаш имкони, алоқаларни кузатиб бориш ва соғлиқни сақлаш арсеналида бошқа воситаларни ўз ичига олишни англатади», — дея қайд этди Гебрейесус.

Ҳозирги кунда коронавирус инфекциясини самарали даволай оладиган препарат мавжуд эмас, дея огоҳлантирди ЖССТ вакиллари.

Шу билан бирга, ташкилотда қайд этишларича, ўз вақтида ёрдам бериш, шу жумладан, нафас олиш ва тўғри парваришлашда кўмак кўрсатиш беморларга асқатиши мумкин.

Маълумот учун, Хитойда тарқалган янги турдаги коронавирус қурбонлари сони бир ой ичида 2012 йилги Яқин Шарқ респиратор синдроми (MERS-CoV) оқибатида ҳалок бўлганлар сонидан ошиб кетди. 9 февраль ҳолатига кўра, Хитойда янги турдаги коронавирус қурбонлари сони 908 кишига етди. Хитой коронавирус эпидемиясига қарши курашиш учун 10,3 миллиард долларга яқин маблағ сарфлади.