Ўзбекистон чегара пунктларида қанча фуқаро коронавирусни аниқлаш мақсадида термометриядан ўтказилгани айтилди

Тошкент халқаро аэропортига 6 февраль куни хорижий давлатлардан 38 та самолёт қабул қилиниб, 4 374 нафар фуқаро «Ўзбекистон темир йўллари» АЖ марказий санитария-эпидемиология хизматига қарашли 6 та санитария-карантин пунктидан 6 та поездда, жами 1 399 нафар фуқаро, чегаралардаги санитария-карантин пунктлари орқали 28 863 нафар фуқаро термометриядан ўтказилди. Бу ҳақда «Дарё»га ССВ ҳузуридаги Санитария-эпидемиологик осойишталик агентлиги коронавирусга қарши марказий штаби маълум қилди.

6,7 февраль кунлари ССВ, ФВВ, Давлат божхона қўмитаси ва бошқа тегишли ташкилот ва идоралар мутахассислари билан ҳамкорликда Тошкент вилояти Тошкент туманида жойлашган «Навоий» чегара-божхона постида «Янги коронавирус инфекциясини республика ҳудудига четдан кириб келиши ва тарқалишини олдини олишда ФВДТ раҳбар органлари ва куч-воситаларининг ҳамкорликдаги ҳаракатлари» мавзусида кўргазмали махсус-тактик ўқув машғулоти ўтказилган.

Қайд этилишича, бу каби амалий машғулотлар бутун республика бўйлаб ташкил этилмоқда.

Бундан ташқари, Савдо саноат палатаси, Бош прокуратура, «Ўзбекистон темир йўллари» АЖнинг «Саломатлик» поликлиникаси ходимлари ҳамда Тошкент—Волгоград ва Андижон—Уфа йўналишидаги вагон кузатувчилари билан «Янги коронавирус инфекцияси, унинг бирламчи симптомлари, касалликка гумон қилинган беморлар аниқланганда амалга ошириладиган чора-тадбирлар» мавзусида семинарлар ўтказилди.

Мамалакат аҳолиси ўртасида коронавирус инфекцияси бўйича эпидемиологик барқарорликни таъминлашга йўналтирилган барча профилактик ва эпидемияга қарши тадбирлар Санитария-эпидемиологик осойишталик агентлиги томонидан халқаро тиббий санитария қоидалар талаблари асосида амалга оширилмоқда. Бу касалликни республика ҳудудига кириб келиши ва тарқалишини олдини олиш борасида амалга оширилаётган профилактик тадбирлар Санитария-эпидемиологик осойишталиги агентлиги томонидан назоратга олинган.

7 февраль куни Санитария-эпидемиологик осойишталик агентлиги томонидан Хитойдан келган фуқародан таҳлил учун намуналар олиниб, агентликнинг вирусология лабораториясига жўнатилган, таҳлил натижаларига кўра улардан коронавирус инфекцияси топилмаган эди.