Тошкент вилояти ИИББ ҳузуридаги Тергов бошқармаси томонидан ўтган 2019 йил давомида фуқаролар ва давлат ташкилотларига етказилган 20 миллиард 860 миллион 455 минг сўмлик моддий зарарлар ундирилиб, қонуний эгаларига қайтарилди. Бу ҳақда Тергов бошқармасининг 2019 йил сарҳисобига бағишланган якуний йиғилишида маълум қилинди.
ИИББ матбуот хизмати хабарига кўра, ўтган 2019-давомида жами 5 305 та жиноят ишлари тергов қилинган бўлиб, уларнинг 75,3 фоизи тўлиқ тамомланган. Жиноятларни ўз вақтида фош этиш, ҳар томонлама, тўла ва холисона тергов қилиниши юзасидан манзилли чора-тадбирлар белгиланганлиги сабабли ўтган йилга нисбатан 469 тага камайган ёки 533 та жиноят ишлари тўхтатилган. Бу 2018 йилга нисбатан 46,8 фоизга яхшиланганини кўрсатади.
Қидирув асоси билан тўхтатилган жиноят ишлари 468 тадан 383 тага камайишига эришилган. Ходимлар томонидан қидирувдаги 7 та шахс ушланган.
Шу билан бирга, келиб тушган жами 1 500 дан ортиқ жисмоний ва юридик шахсларнинг мурожаатлари кўриб чиқилган бўлиб, уларнинг 37,2 фоизига ҳуқуқий тушунтиришлар берилган бўлса, 62,8 фоизи ижобий ҳал этилган. Жумладан, бошқарма ва унинг қуйи тизимлари томонидан йил давомида тергов қилинган жиноят ишлари бўйича фуқароларга, давлат ва жамоат ташкилотларига етказилган 20 миллиард 860 миллион 455 минг сўмлик моддий зарарлар ундирилиб, қонуний эгаларига қайтарилганлиги маълум қилинди.
Изоҳ (0)